Parlamenterê Iraqê yê Êzidî Mehma Xelîl û du parlamenterên din ên Êzîdî ragihandin, ew bang li Parlamentoya Iraqê dikin ku tawanên DAIŞê yên li dijî Êzîdiyan wek jenosîd nas bike.

Parlamenterê parlamentoya Iraqê Mehma Xelîl ligel 2 parlamenterên din ên Êzidî civîneke rojnamevanî li parlamentoya Iraqê li dar xist.

Xelîl di civînê diyar kir, biryara naskirina jenosîda Êzidiyan ji aliyê parlamentoya Iraqê ve girîng e, ji ber ku parlemantoyên 13 welatan tawanên DAIŞ’ê yên li dijî Êzidiyan, weke jenosîd qebûl kirine.

Mehma Xelîl got: “Projeyasayeke me heye, em ê hemû hewlên xwe bidin, ji bo wê yekê bikin yasa, ku di projeyasayê de aliyên ewlekarî, civakî û darayî hene, ji bo Êzidî ji hemû aliyan ve werin qerebûkirin. Herwiha ew yasa jî bibe parêzvanek ji bo rêgirtina li dubarebûna van tawanan, ji ber ku Êzîdî di dîroka xwe de 74 caran hatine qirkirin.”

Xelîl destnîşan kir, “Heta ev projeyasa, bibe yasa, em ê di hewlên xwe de berdewam bin.”