Rewangeha Sûrî ya Mafên Mirovan belav kir, bo berferehkirina bingehên xwe yên leşkerî û firokxaneyên xwe li Heseke, Dêra Zorê, Reqa û Kobanê Hevpeymaniya Navdewletî ya li dijî DAIŞê di çend rojên bûrî de 150 barhilgirên çek û cebilxane û alavên lojistîk derbasî Sûriyê kirine.

Tenê di meha Tebaxa bûrî de, 1450 barhilgirên leşkerî derbasî rojhilatê çemê Ferêt bûn û ber bi firokxaneya Şedadê li başûrê Hesekê ve çûn.

Li gor Rewangehê, ji destpêka meha Tebaxa bûrî ve, Hevpeymaniyê 1900 barhilgir gihandine navçeyên di destê HSDê de ne li rojhilatê çemê Ferêt.

Berî niha hatibû belavkirin, Amerîka kar li ser ferehkirina firokxaneya Şedadê li Hesekê û bingehên xwe yên li Kobanê dike.

Li gor zanyariyên Rewangeha Sûrî, Hevpeymaniya Navdewletî herî kêm 18 bingeh û baregehên xwe li rojhilarê çemê Ferêt, Minbic, Kobanê, Xirab Işk, Eyn Îsa, Reqa, Tebqa, Şedadê, Hol, Til Temir, Til Bêder, Rimêlan û kêlgeha el-Omer li Dêrezorê ava kirine.