Merkezê Xeberan - Rîyê vîrusê Korona ra DÎSK, KESK, TTB û TMMBOyî emser qerar dayê ke 1ê Gulane pîroz nêkerê herinda ci de verê Peykerê Taksîmî de şayîyêka sembolîke bikerê.

Şayîya Taksîmî ra verî polîsan dormeyê bînaya merkezî ya DÎSKî ya Beşîktaşî girewt.

Rîrê ablûqa ra zî Sereka Pêroyî ya DÎSKî Arzu Çerkezoglu û îdarekaranê sendîkayan pê çelengê 1ê Gulane bîna ra vejîyayî. Verê cû Arzu Çerkezoglu û îdarekaran hetê polîsan ra amê tepiştene. Polîsan nêverda ke sendîkayî ver bi Taksîmî şêrê. La dima sendîkayan dest pê rayraşîyayîşê xo kerd û polîsan înan rê mudaxele kerd.

Çelengî hetê polîsan ra ameyî parçekerdene û Arzu Çerkezoglu zî tede zaf kesî ameyî tepiştene. Sekreterê Pêroyî yê DÎSKî Adnan Serdaroglu, Serekê Dev-Yapi-Îş Ozgur Karabulut, Serekê Sendîkaya Werd-Karî Seyît Arslan, Serekê Sendîkaya Enerjî Suleyman Keskîn, Serekê Sendîkaya Weşîye Erdogan Demîr, Serekê Şubeyê Îstanbulî yê Sendîkaya Tekstîlî Asaletîn Aslan, Pisporê DÎSKî Faruk Işik, Pisporê Sosyal-Îşî Cemal Bîlgîn, îdarekarê Bîrleşîk-Metal Îş Muhammet Yurtsever, Sekretera Pêroyî ya Halkevlerî Ozge Ozan, endamê Halkevlerî Ersîn Kîrîş, Şêwirmendê TÎPî Bariş Atay, Polat Denîş  ameyî tepiştene.

Sereka Pêroyî ya DÎSKî Arzu Çerkezoglu û ê kesê bînî ameyî neqlê  mudirîya polîsan bîyî.

Çerkezoglu hesabê xo yê medyaya komelkîye de nê çîyî pare kerdî: ''Ma nezaret de yê! Ewro wexto ke her cayê Tirkîya de karkerî xebitîyenî  nîzamê umûmîye nêxeripîya la şayîya karkeran nîzamê umûmîye xeripnaya!''