Serra newîye de kitabê Kirdkî yê neweyî vejîyay. Weşanxaneyanê Roşna û Avesta ra bi temamî 4 kitabê kirdkî vejîyayî.

Kitabê ke weşanxaneyê Roşna ra vejîyayî nê yê:

-Aydin Batur, Seîd Altun: “EMIR ŞI”

Kitab derheqê cuya hunermendê erjayeyî Seîd Altunî de yo. Seîd Altun Çewlîg ra, mintîqeya Verardî ra, Lotan ra yo. Serra 1949 de ameyo dinya. Teyna mektebo verîn qedênayo. 1966 de dest pê vatişê deyîran kerdo. Dima, semedê muzîkî şîyo Îstanbul û uca 12 hebî plakê 45inî yê qijî vetê. Serra 1972 de şîyo Xarpêt, kasetê xo yo verên uca vetê. Tiya ra pey êdî temamen xo dayo karê muzîkî ser. Dima dest pê deyîranê bi kirdkî kerdo, bi desan deyîrî vatê. Seîd Altun roja 3ê nîsana 2018î de şi rehm.

-Evdî Hesqera, Merhebaya Nîmeyê Şewe

Kitab kitabê hîkayeyan o û tede 22 hîkayeyî estê. Evdî Hesqerayo ke aslê xo de kirdas o reya verêne bi kirdkî kitabêk nuşto.

-Mehmet Mehdi Özsoy, Vengê Welatî, Dîwan II

Kitab dîwano diyîn ê Mehdî Ozsoyî yo. Babîyê ey Mehmed Zekî efendî, hetê dadî ra tornê Şêx Seîd Efendî, hetê babî ra zî tornê Şêx Hesen Naqî Efendî yo. Şêx Hesen Naqî lajo pîl yê Şêx Elîyê Palî yo. Dadîya ey Fatma xanime şêxanê Kelaxsî ra ya. Mehdî Ozsoy 1944 de Pali de ameyo dinya, 2009 de Amed de şîyo rehm. Wextê xo de heta lîse wendo, dima sey mamosta tayîn bîyo û wextêk mamostatîye kerda. Nê dîwanî de 126 şîîrê Mehdî Ozsoyî estê.

Weşanxaneyê Avesta ra romanê 'Merreyî û Merdimî' yê John Steinbeckî vejîya. Roman hetê Sezgîn Firatî ra açarîyayo.