8emîn Festîvala Navnetewî ya Fîlmên a Duhokê îro dest pê kir. Di festîvalê de ji 30 welatan 45 fîlm û bi giştî 94 fîlm wê bên nîşandan.

8emîn Festîvala Navdewletî ya Fîlman a Duhokê bi meşa xalîçeya sor dest pê kir. Festîvala ku dê heta 22ê Mijdarê berdewam bike dê 94 fîlmên navxweyî û biyanî bên nîşandan.

Serokwezîrê Herêma Kurdistanê Mesrûr Barzanî, Wezîrê Ciwan û Çandê Muhammed Heme Seîd û parêzgarê Duhokê Elî Teter jî beşdarî vekirina festîvalê bûn.

Mesrûr Barzanî di axaftina xwe ya festîvalê de diyar kir ku dîroka Kurdistanê weke ku heq dike di sînemayê de dernakeve û hêviya serkeftinê ji bo hemû berhemhêner û derhênerên ku berhemên xwe li Herêma Kurdistanê kişandine xwest.

Barzanî balkişand li ser wê yekê ku festîvalên bi vî rengî dibe sedema geşepêdana Herêma Kurdistanê û amaje bi wê yekê jî kir ku bi rêya hunerê dikarin peyamên gelek girîng bidin civakê.

Mesrûr Barzanî got “ Gelê Kurdistanê di dîroka xwe de bi dehan caran rastî karesat, komkujî û tevgerên tasfiyeyê hatiye. Mixabin, her çend ev bûyerên di dîroka me de dikarin bibin mijara bi dehan fîlman, ev trajedî nekarîn wekî tê xwestin bibin fîlm.

Wezîrê Çandê Muhammed Heme Seîd jî got sînema di navbera civak, gel û çandan de weke pirekê tevdigere.

Muhammed Heme Seîd bi bîr xist ku Festîvala Navdewletî ya Fîlman a Duhokê bal kişand ser girîngiya jîngehê li ser guherîna avhewayê ku yek ji pirsgirêkên herî girîng ên cîhanê ye îsal û wiha berdewam kir “Ev pirsgirêk niha bûye pirsgirêka herî girîng a cîhanê. Qirêjiya jîngehê û guherîna keşûhewayê ku rojeva sereke ya civaka navneteweyî ye, li ser mirovahiyê û dinyayê xeteriyeke mezin e.”

Berdevka Çapemeniyê ya Festîvalê Sahan Arif ji Rûdawê re diyar kir ku ji derve zêdetirî 200 fîlm ji bo festîvalê hatine şandin û got “Lê belê jûriya me guncaw dît ku ji 30 welatan 45 fîlm beşdar bibin. Bi giştî 94 kurtefîlm û kurtefîlm dê bên nîşandan.”

Sahan Arif diyar kir ku dê di çarçoveya festîvalê de tedbîrên li dijî vîrusa koronayê bên şopandin û got, "Wê li salona 700 kesî bi beşdariya 300 kesî pêk were."

Di roja yekem a festîvalê de fîlma derhêner Şewket Emîn a bi navê “Ezmûn” hat nîşandan.

Rûdaw