Li gor ajansa fermî ya hikûmeta Tirkiyê AAyê, îro Duşemî 24ê Hezîranê şervanên yekîneyên Parastina Gel (YPG) li gundê Tel Malid a li başûrê Marihê ku girêdayî Ezazê ye, êrîşî çekdarên ser bi mixalîf ên Sûriyê yên bi navê Artêşa Sûriyeya Azad kirine.
 
Li gor heman nûçeyê, piştî ku şervanên YPGê êrîş kirin, çekdarên mixalîf jî bersiv dan û  demeke kurt di navbera herdû  aliyan de şer berdewam bû.
 
Anadoluyê ragihandiye, di encama şer de çekdarekî mixalîf ê Sûriyê hatiye kuştin û 2 çekdarên din jî birîndar bûne.
 
Li gor agahiyan, çekdarên mixalîf piştî vê êrîşê, ketine tevgerê û tedbîrên xwe yên ewlehiyê zêdetir kirine.

 YPG hê jî di derbarê vê êrîşê de tu daxuyanî nedaye..
 
Piştî kontrolkirina Efrînê ji aliyê Artêşa Tirkiyê û çekdarên mixalîf  yê Sûriyê ve, tekane cihê ku hêj YPG li vê derê maye, herêma Şehbayê û 12 gundên bajarokê Şêrawa ya Efrînê ne.