Wezareta Şehîdan û Enfalkiriyan ya Kurdistanê ragihand, ew texmîn dikin derdora 170 kes di gora bi kom ya Semawe de hatibin binaxkirin.

Berdevkê Wezareta Şehîdan û Enfalkiriyan ya Kurdistanê, Fuad Osman got, hetanî niha hestî û pirûskên 113 kesan di gora bi kom ya Semawe de hatine derxistin. Ev jî nîşan dide hejmara wan kesên ku di wê gorê de hatine binaxkirin, ji amara ku beriya niha hatibû ragihandin, zêdetir e.

Fuad Osman her wiha got, vedana wê gorê heta du rojên din jî xilas nabin. Bi texmîna me derdora 170 kes di wê gorê de hatine binaxkirin.

Beriya niha hatibû gotin ku derdora 90 kesan di wê gorê de hatine binaxkirin.

Berdevkê Wezareta Şehîdan û Enfalkiriyan da zanîn, li devera Semawe du gorên din jî hene û got, piştî vedana wan goran dê bermahiyên cenazeyan bo Bexdayê bên şandin da ku têsta DNA were kirin, paşê dê bi merasimekê derbasî Kurdistanê bên kirin û li devera Germiyan bên veşartin.