Navenda Nûçeyan- Li Weqfa İsmail Beşikçîyî ya Stenbolê akademîsyen û lêkolîner Adnan Çelîk wê semînerekê derbarê “Têkoşerîya Polîtîk a Kurdan li Ewropayê” bide. Bername wê 11ê Kanûna Paşîyê saet di 14.30 deqîqeyan de dest pê bike. Çelîk wê di bernameyê de wê li ser salên 1950 û 1960î aktîvîzma sîyasî ya kurdan a li Ewropayê bisekine. Bi taybet jî wê li ser Komeleya Xwendekarên Kurd li Ewropa (KXKE) nirxandinan bike û zanyarîyan bide.

Moderatora bernameyê Kubra Sagir e.

Komeleya navborî di sala 1956an de li Almanyayê ji alîyê 17 xwendekarên kurd ve hatîye damezrandin û di demeke kurt de bûye referanseke sereke ji bo têkoşerîya sîyasî ya kurdên li Ewropayê. Heman komele, piştî pêşketinên li Herêma Kurdistanê gihîştîye 18 şaxan û bi hezaran endamên wê çêbûne. Salên 1960î yên ku li hemû cîhanê wekî dehsalîya "ciwanên şoreşger" tête pênasekirin, ji bo Komeleya Xwendekarên Kurd li Ewropa jî bi heman rengî hatîye dîyarkirin û ji kurdan re mîrateyeke veşartî hiştîye. Di vê pêşkeşîyê wê Adnan Çelîk hew bide ku ew mîrateya veşartî ya salên 1960î derkeve holê û nexşeyeke tora milîtanîzma çandî û sîyasî ya xwendekar, rewşenbîr û pênaberên kurd çêbibe.