Frankfurt de  cergêkê DAÎŞî ke domanêka êzidî têşanî ra qetil kerdbî bi hepsê muebetî ame cezakerdene. Heyetê Mehkeme Fermanê 73. yê vera êzidîyan zî sey qirkerdişî name kerd.

Çeteyanê DAÎşî ke 3ê tebaxe ya 2014î de hêrişê Şingalî yo ke sey mekanê bimbarekî yeno naskerdene, kerd, bi hezaran êzidîyî qetil kerdî û bi hezaran cinî û domanî remnayî û bazaranê esîran de rotî. No qirkerdişo ke êzidîyî sey Fermanê 73. name kenê badê 7 serran reya verêne hetê yew mehkeme ra sey qirkerdişî ame namekerdene.

Çeteyanê DAÎŞî ra Taha El-Jumaillyo iraqij  nîsana 2020î ra nata bajarê Frankfurtî yê Almanya de ameyêne muhakemekerdene. Domanêka pîya bi dayîka ci bazarê esîran ra ameye herînayene rîyê nê çeteyî ra têşanî ra dinyaya xo bedilnaye.

Taha El-Jumaillyî dayîke û domana ci rê îşkenceyê ke nêkerdî nêverdayî û tewr peynî de gama de virisnî de germîye 50 derece bî domana 5 serrîye verê çimanê dayîka ci de  binê tîje de giredaye. Domane têşanî ra bi îşkenceyî dinyaya xo bedilna.

Heyetê mehmke ewro qerarê xo yê derheqê çeteyî de eşkera kerd. Mehkeme hêrişê vera êzidîyan sey qirkerdişî name kerd  û seba ke Taha El-Jumaillyî vera merdimîye sûc kerdo cezaya muebetî daye ci. Mehkeme reyna qerar girewt ke do 50 hezar Ewro sey tazmînat bidîyo dayîka domanêka ameya qetilkerdene.

Aşmêke verî zî Mehkemeya Berze ya Edaletî ya Munîhî  cinîya Taha El-Jumaillyî ya almane Jennifer W. ya  ke hemkara sûcê ey bî rê cezaya des serran birnaybî.