Merkezê Xeberan - Peymangeha Robert Kochî aşkere kerd ke, Almanya de 36 hezar kesan ra zêde kesî bi vîrusê Korona kewtî.

Gorê beyanatê peymangehe, ewro 4995 kesî Almanya de bi vîrusê Korona kewtê û 50 kesî zî merdê.

Bi no qayde Almanya de hûmara kesê ke bi vîrusê Korona kewtî resa 36 hezar û 608 kesan û hûmara kesê ke bi virusî merdê zî resa 198 kesan.

Çend rojî verê cû Serekwezîra Almanya Angela Merkel zî kewtbî karantîna û testê aye negatîf vejyabi.

Gorê Teşkîlatê Weşîye yê Dinya, dinya de Ewropa bîya merkezê vilabîyayîşê vîrusê Korona, Almanya zî Îtalya û Îspanya ra dima dora hîreyîne de ca gêna.