Li Mala Edebiyatê (Literaturhaus) ya bajarê Dortmundê yê Almanyayê 17ê Gulanê şevbihêrka helbestên Kurdî-Almanî tê sazkirin.

Bi pêşengiya nivîskar û wergêrê Kurd Abdullah Încekan cara sêyemîn e li Almanyayê şevbihêrka helbestên Kurdî-Almanî tê lidarxistin.

Di şevbihêrka helbestên Kurdî-Almanî ya roja 17ê Gulanê de nivîskar Abdullah Încekan û Veronika Nickl dê helbestên şairên Kurd Rojen Barnas, Abdullah Peşêw, Şikoyê Hesen, Berken Bereh, Arjen Arî, Mueyed Teyîb û klasîkên edebiyata Almanî Johann Wolfgang von Goethe, Heinrich Heine, Erich Fried, Ingeborg Bachmann, Rainer Maria Rilke û Friedrich Nietzsche bi zimanên Kurdî û Almanî pêşkeş bikin.

Kemanjena naskirî Nûrê Dlovanî û piyanîst Zelal jî dê bi ahenga mûzîka Kurdî tevlî pira di navbera her du zimanan de bibin.

Bername dê 17ê Gulana 2024an demjimêr 20:00î li navnîşana “Literaturhaus Dortmund, Neuer Graben 78 | 44139 Dortmund” bê sazkirin.

Încekan, helbestên klasîk ên Almanî wergerandibûn Kurmancî û wekî pirtûk di bin navê ‘Deriyê Dil’ ji Weşanên Nûbiharê û li Almanyayê jî ji weşanên Reichert-Verlag derxistibû.

Nivîskar Încekan bi rêya Rûdawê bangî Kurdên Almanyayê kir ku beşdarî bernameyê bibin.