Danûstandin di navbera ENKS û PYNKê berdewam e. Qonaxa duyemîn ji giftûgoyan ber bi dawîbûnê ve diçe û ta niha her du alî bi erînê diyalogê dinirxînin. ENKS dide zanîn ku mijara Lêvegera Siyasî bi dawî hatiye û li ser hatiye lihevkirin, nemaze şêweyê standina biryarên giştî bi awayekî hevbeş û niha amadekariya destpêkirina qonaxa sêyemîn tê kirin.

Endamê Komîteya Navendî ya PDK-S Nafi Ebdela wê derbarê de ji K24ê re got: “Ji sedî 90 ji qonaxa duyemîn a danûstandina bi dawî bûye. Ji pirsên ku mane û hin nakokî li ser hene, pirsa peymana civakî (destûr) e û pirsa rêjeya nûnertiyê ye, hin lihevkirina di wan her du pirsan de heye û lê tiştekî kêm tê de maye. Niha derbasî qonaxa sêyemîn dibin û pirsa rêveberiyê dê were guftûgokirin”.

Her du alî hevnerîn in ku tiştê zehmet derbas bûye û diyalog bi rihetî derbas dibe. Serkirdeyên PYNKê dibêjin, danûstandin li ser rêvebiriyê û peymana civakî ya ji alî rêvebiriya xweser ve hatibû danîn tê kirin, lê hîn ne diyar e gelo peyman dê were sererastkirin yan dê wekî xwe bimîne.

Sekretêrê Partiya Çep a Demukrat a Kurd Salih Gedo dibêje: “Diyalog bi rengekî baş di navbera her du aliyan de bi rê ve diçe. Civata dawiyê jî ya herî serkeftî bû û gelek xal tê de hatin çareserkirin. Dikarim bibêjim ku pirsa Lêvegerê me bi dawî kiriye û tenê xalek tê de maye û niha guftûgo li ser dibe û di baweriya min de, dê di demeke nêzîk de çareser bibe”.

Xala nakok di qonaxa duyemîn de maye, pirsa par û rêjeya rêvebiriyê ji her aliyekî re ye û hîn jî lihevkirin ser vê xalê nehatiye kirin. Li aliyekî din, her du alî tekez dikin ku Amerîkî di navbênkariya xwe de cidî ne û di beşdariya xwe de di van danûstandinan de berdewam in. Ligel berdewamiya diyaloga Kurdî – Kurdî, kolana rojavayê Kurdistanê jî bi hêvî ye ku encam bilez û erênî bin.