Merkezê Xeberan-Torra Têkoşînê Vera Şîdetê Serê Cinîyan a Amedî Şûbeyê Amedî yê ÎHDyî de raporê şîdetî yê vera cinîyan ê 5 menganê peyênan eşkera kerd. Wekîlê HDPyî yê Amedî, Remzîye Tosun, Dersime Dag, Endama Sazkerdoxe ya Komeleya Cinîyan a Rosa Ayla Akat Ata û zaf cinîyî tewrê eşkerakerdişî bîyî.

Rapor hetê endama Torra Têkoşînê Vera Şîdetê Serê Cinîyan Avûkate Oyku Çakmak ra ame wendene.

Goreyê raporî 5 mengan de 838 cinîyanê Amedî û qezayanê ci muracatê Torra Têkoşînê Vera Şîdetê Serê Cinîyan kerd û înan ra 720 cinîyanşîdeto psîkolojîk, 422ê ci şîdeto fîzîksel, 392ê ci şîdeto ekonomîk, 321ê ci şîdeto dîjîtal, 198ê ci zî şîdeto komelkî dîyî. Cinîyê ke muracatê torre kerd şîdetê tewir bi tewir dîyî û zafê înan hetê camêrdanê xo ra ameyî şîdetdîyene. Se ra 85ê cinîyî şîdeto sîstematîk vînenî û hem mîyanê komelî de hem zî zereyê keyeyî de maruzê şîdetî benê.Çakmake eşkera kerd û vat: "97 domanî maruzê şîdetê cînsî bîyî ke serranê înan mabênê 15-18î de yê. Nê serebûtan ra zafêrî serranê qijkekan de zewijîyayîş ê."

Goreyê raporî 5 menganê peyênan de Amed de 3 cinîyî hetê camêrdan ra ameyî qetilkerdene. Çakmake bale ante ser ke şaristan de serebûtê xokiştişî zî zêde yê. Çakmake îfade kerd ke bi rayîrê medyaya komelkî şaristananê bînan ê Tirkîya ra 5 mengan de Torra Têkoşînê Vera Şîdetê Serê Cinîyan rê 62 muracatî ameyî kerdene û seba nînan zî hetkarîye ameye kerdene. Çakmake vat ke ê do seba têkoşînê şîdetî yê vera cinîyan paştdayîşan û hetkarîyan dewam bikê.