Yeno vatene ke reqamê vîrusê Korona yê ke hetê dewleta Tirkîya ra yenê aşkere kerdene raşt nîyê û hûmara raştikêne ya  merg û nêweşan  xeylî zêde ya. Wezaretê Weşîye da zanayîş ke heta nika 6 hezar û 209 kesî vîrusî ra merdî. La eşkera bi ke têna Amed de goristanê vîrusê Korona de 540 kesî ameyî definkerdene.

Amed de her roje senî ke waqayî zêdîyenê meselî zî hende zêdîyenê. Goristan de 8 parselî zî bîyî pirr la her roje cenazayê neweyî yenê. 

Hemserekê SESî yê Amedî Şîyar Guldekînî îzah kerd ke, Yenikoyê Amedî de zî goristanêk de cenazayî yenê definkerdene û reqamê ke Wezaretê Weşîye dana raşt nîyê.

Guldekînî vat: ''Amed de her roje 700-750 nêweşê Korona yenê nêweşxane.  Înan ra 150 kesî servîsê ciewnîyayîşê giranî de yê. Nê hîrê rojan de 23 kesî têna Amed de merdî. Vizêrî ra heta ewroyî zî 8 kesî merdî. Dewlete hûmara raştikêne nimnena û  doneyan manîpule kena.''