Fatma Yılmaz

Amed de aktîvîteyê Roşanê Ziwanê Kurdkî vizêr bi konserêkê coşînî qedîyayî.

Amed de Torra Ziwan û Kulturê Kurdan û Platformê Ziwanê Kurdkî (PZK) vizêr aktîvîte û çalakîyê Roşanê Ziwanê Kurdkî bi konserêkî qedînayî.

Konsero ke qezaya Yenîşehîrî de ame kerdene rê xeylê sîyasetmedarî, Ma Muzîk û xeylê hemwelatîyî beşdar bîyî. Warê konserî de bi kirdkî pankarta 'Ziwanê ma estbîyayîşê ma yo', 'Verdibistanê ra heta universitê perwerdeyo bi ziwanê dayîke', 'Ziwanê kurdkî krîterê welatperwerî yo' ameyî akerdene.

Hemserekê MED-DERî Rifat Ronîyî konser de qisey kerd û pare kerd ke kurdî wextêkê dergî ra nata seba ziwanê xo têkoşîn kenê. Ronîyî vat: ''Ma soz da ke xeyalanê Mîr Bedirxan, Elî Herîrî, Fekeyê Teyran, Apê Musayî bîyarê ca.  Ziwan seba kurdan mefteyê azadîye yo.''

Vervatoxê TZPyî Şerefxan Cizîrîyî zî dima qisey kerd û bale ante kerdişanê qeyûman ê vera kurdkî ser.

Girseyî konser de vera sloganê sey 'Bê ziwan cuye nêbena', 'Ziwanê ma rûmetê ma yo' vatî. Konser de Sorijîyan û Hereme Nêrgîze vejîyayî sehne ser.