Amed de walîtîye heqê mînîbusanê zereyê şaristanî se ra 25 zêdîna. Hemwelatîyanê Amedî vanê, ma do mîyanê nê krîzî de na vayî qet qebul nêkenê.

Amed de walîtîye heqê mînîbusanê zereyê şaristanî  se ra 25 zêdîna. Walîtîye verî zî heqê mînîbusan zêdînabi. Bi no qayde heqê mînîbusan 2 TL ra zêdîya bi 2,50 TL. Par heqê mînîbusan 1,50 bi.

Ne Merkezê Koordînasyonê Reseyî yê Şaredarîya Amedî (UKOME) ne zî walîtîye derheqê vaykerdişî de beyanatêk nêday. Hemwelatîyî serê sibayî wexto ke şîyêne kar û gureyê xo raştê  vayî ameyî.

Serekê Odaya Şofêran yê Amedî Sidki Egeyî serê sibayî Walî û Qeyûmê Şaredarîya Amedî Munîr Karalogluyî rê sipas kerd.

Hemwelatîyanê Amedî vera vaykerdişî nêrazîbîyayîşê xo medyaya komelkîye de mojna. Hemwelatîyan vat: ''Emser meaşê ma se ra 25 nêzêdîya. Şima senî eşkenê hende heqê mînîbusan bizêdînê? Ma naye qet qebul nêkenê.''