Merkezê Xeberan- Kombîyayîşo ke bi armancê vate, şekl û hemkarîya tifaqê netewî û bi vengdayîşê PAK û PSK amebi organîzekerdiş, roja 13.01.2020 de Amed de virazîya.

Xeylê sîyasetmedarê Kurdistanî ke ameybî dawetkerdiş amê kombîyayîş. 2 Temsîlkarê HAK-PARî zî sey muşahîd beşdarê kombîyayîşî bîyî. Televîzyonê Kurdî zî destpêkê kombîyayîşî de hazir bîy.

Kombîyayîş hetê Hetkarê Serekê Pêroyî yê PSKyî Bayram Bozyelî û Endamê Komîteya Îdarekere ya Merkezî ya PAKî Vahit Abayî ra ame îdarekerdiş.

Destpêkê kombîyayîşî de namayê PAK û  PSKyî ser o, Vahit Aba qiseykerdişêk kerd. Abayî qiseykeridşê xo de wina va:

“Temsîlkarê Çapemenî, ronşvîr û sîyasetmedarê ercîyayê

Merheba şima rê, sima bi xeyr ameyî nê kombîyayîşî 

Ma sey PSK (Partîya Sosyalîst a Kurdistanî) û PAK(Partîya  Azadîya Kurdistanî), nê prosesê  hesasî de ma wazenê şima reyde meseleya tifaqê netewî ser o qisê bike û rayîr û metodê caardişê na lazimtîya miletê ma pîya tesbît bike.  

No kombîyayîşê ma seba ney ameyo organîzekerdiş.

Seke yeno zanayîş miletê Kurd û şarê Kurdistanî demêkê xidarî ra vîyarenê. Şarê ma û welatê ma Kurdistan binê teda û dorpêçêkê zafhetî de yo. Seba qedînayîşê zordarîye û şikitişê zîncîra zilmî, awankerdişê tifaqêko hîra yo neteweyî û demokratîk sey wezîfeyêko tarîxî vernîya ma de vinderte yo. Seba caardişê karêko winasî, mesûlîyet milê her kesî sero yo. 

Zanîyeno ke verî zî ma seba nê armancê xo kombîyayîşêk kerdbi û pîya fikir û bawerîya xo pêşkêşê yewbînî kerdbî.

No kombîyayîşo ke ma hadre kerdo de ma do meseleya tifakê neteweyî û demokratikî bi hawayeko zelal nîqaş bike. Ma pêşnîyaz kenî ke, nîqaşê ma wa esasê cêrînê ke kifş bîyê ser o bêrê kerdene. 

1. Armancê Tifaqê Neteweyî 

2. Şeklê Tifaqê Neteweyî 

3. Seba awankerdişê Tifaqê Neteweyî xarîteyêka senî ûsb. 

Nîqaşanê ma yê her hîrê xalan ra dima, ma wazenê pîya, derheqê tifaqê netewî de xerîteyêka ortaxe tesbît bike.

Seba beşdarîya şima ma şima rê spas kenî.’’

Qalîkerdişê Bayram Bozyelî ra dima derheqê şeklê îdarekerdişê kombîyayîşî de malumet da û kombîyayîş dima ra çapemenî ra qefilnaye dewam kerd.

Kombîyayîş de Serekê Pêroyî yê PAKî Mustafa Özçelik û Serekê Pêroyî yê PSKyî Mesut Tek derheqê rojeva ke ameybî tesbîtkerdiş de vîr û rayê partîya xo îfade kerdî. Mesut Tek û Mustafa Özçelikî îzeh kerdî ke, hemkarî û tifaqê netewî gereke bi aktor û prensîbê netewî û niştimanî bêro awankerdiş. Her di Serekan zî hazirîya partîyanê xo ya derheqê gameştişê hemkarî û tifaqê netewî de îzeh kerd.

Qalîkerdişê Serekanê Pêroyî yê PSK û PAKî ra dima, beşdarê kombîyayîşî derheqê lazimtî, rayîr, mana û hemkarîya tifaqê netewî de fikr û rayê xo îzeh kerdî.

Kombîyayîş 5 saete dewam kerd. 

Netîceyê kombîyayîşî de heme beşdaroxî dewamîya viraştişê tayn kombîyayîşanê hîrayînan ser û dîyalog û pîya xebata partî, grûb û şexsê netewî, niştîmanî de hemfikir bîyî.

Kombîyayîş seba sibaroje, hemkarî û tifaqê netewî yê hîrayî û viraştişê înan, atmosferêko weşe û hêvîdar de vîyart.

14.01.2020

PSK(Partîya Sosyalîst a Kurdistanî)

PAK(Partîya Azadîya Kurdistanî)