Virusê Korona Amed de zaf zêde vila bîyo û tehlûkeyê korona sewîyeya tewr berze de yo. Bakûrê Kurdistanî de şaristanê Riha û Entabî zî sey Dîyarbekirî yê û ê cayan de zî hezarn nêweşê Korona estê.

Amed de rojane 2-3 tenî rîyê virusê Korona ra mirenê û tedbîrî zî zaf kêm ê. 

Amed de her roj qasê 120 nêweşê janê Korona peyda benê û nika 4 hezar nêweşê janê Korona estê. Hemserekê Sendîqaya SESî Şiyar Güldiken vano ke, Nêweşxaneyan de kaos esto û xebatkarê weşîye herinda karantina de nêweşxaneyan de şuxulîyenê.

Amed de 3 nêweşxaneyî semedê janê Korona xizmet danê û vajîyeno ke rojane mabênê 300 û 350 nêweşî tedawî benê. Hezaran kesî zî keyeyanê xo de binê karantina de yê.

Hemserekê Sendîqaya SESî yê Dîyarbekîr Şiyar Güldikenî derheqê janê Korona de qisê kerd û va ke: Vera virusê Korona serkewtişêk çin yo. Nê rojanê peyênan de her roj 2-3 tenî rîyê korona ra mirenê. Heta nika Dîyarbekir de 80 tenî rîyê nê janî ra merdî. Nêweşxaneyan de her roj 2-3 xebatkarê weşîye virusê korona kewenî. Heta nika 220 personelê weşîye virus kewtê.

Heto bîn ra Wezîrê Weşîye yê Tirkîya Fexredîn Kocayî aşkere kerd ke, vizîr ra nata 19 tenî virusê Korona ra merdê û 1 hezar û 8 kesê bînî bi korona kewtê.

Wezîrê Tirkîya va ke, hûmara nêweşan tewr zêde nê bajaran de esta û dore wîna ya: Îstanbul, Anqera, Entab, Riha û Dîyarbekir.