Li parêzgeha Amedê ya Bakurê Kurdistanê bi armanca bibîranîna nivîskar û helbestvanê navdar Cegerxwîn dê çalakiyek were lidarxistin.

Cegerxwînê ku di ser mirina wî re 40 sal derbas bûne dê li Amedê were bibîranîn û dê keça wî Boniye Cegerxwîn jî beşdar dibe.

Weqfa Mezopotamyayê ragihand ku 2yê Çiriya Paşînê saet 15:00an li Salona Konferansê ya Navenda Çandê û Kongreyan a Sezaî Karakoçê (Çand Amedê) dê bi beşdariya hunermendan çalakiya bibîranîna Cegerxwîn were lidarxistin.

Hevseroka Şaredariya Bajarê Mezin a Amedê Serra Bucak jî dê beşdarî çalakiya bibîranînê bibe.

Nivîskarên Kurd ên wekî Berken Bereh, Malmîsanij, Mehmûd Lewendî, Salih Akin û Şêx Mizbeh jî dê li ser berhemên Cegerxwîn biaxivin.

Seydayê Cegerxwîn beriya niha bi 40 salî, 22yê Çiriya Pêşîna 1984an li Stockholma paytexta Swêdê koça dawî kir.

Helbestvanê navdar li bajarê Qamişloyê yê Rojavayê Kurdistanê li hewşa mala xwe hat veşartin.

Cegerxwîn jiyana xwe di nava wêje û siyasetê de derbas kir û li pişt xwe gelek berhemên dewlemend hiştin ku ji helbest, ferheng û çîrokan pêk tên.