Navenda Nûçeyan- Ebdulkerîm, endamê kumsipîyan, radigihîne, “Şeva derbasbûyî firokeyên şer Erîha bi rêya sê êrîşên ezmanî kirin armanc, di encam de nexweşxaneya Şamî li taxa Meydan ji kar ket, û çend karmend birîndar bûn, herwiha tax bi tevahî wêran bû. Me karmendên kumsipî veguhestin nexweşxaneyê, gelek birîndar hene, heta niha 10 kes hatine kuştin û bi dehan jî kes birîndar bûne.”

Gelek koçberên Şama paytext jî li bajarê Erîhayê dimînin, di encama vê êrîşê de hinek ji wan bûn qurbanî. Herwiha bi gotina kumsipîyan gelek kes li ser rêya revê hatin kuştin.

Ebû Umer, koçberê Şamê, dibêje, “Ez li derveyî mala xwe bûm ligel cîranekî xwe, me xwe ji ber mûşekekê veşart, piştre em derketin daku alîkarîya xelkê bikin, cardî em hatin bombebarankirin, ez birîndar bûm û cîranê min hat kuştin, û kesekî din rewşa wî li nexweşxaneyê zêde xerab e, dibe ku bemire, ji ber nêzîka yek kîlo xwîn ji dest da.”

Ji alîyê xwe ve, Rêveberîya Tendirustî ya Idlibê ragihand, ku piştî armanckirina nexweşxaneya Şamî li Erîhayê ji alîyê firokeyên Rûsyayê ve, niha ti navendek tendirustî li başûrê parêzgeha Idlibê saxlem nemaye, herwiha tekez kir, ku ji ber zêdebûna derbideran ber bi bakurê Idlibê ve, niha rewşa tendirustî ya xelkê li jêr guşarek mezin de ye.

Rûdaw