Qezaya Şaxî ya Wanî de hemwelatîyî Osman Şîban û Servet Turgutî helîkopterî ra erzîyabî war. Wezîrê Pawitişî û Serekê artêşa tirke Hulusî Akarî hedîse înkar kerd.

Qezaya Şaxî ya Wanî de hemwelatî Osman Şîban û Servet Turgutî hetê eskeran ra îşkence dîbi û helîkopterî ra erzîyabî war. Wekîlê CHPyî Sezgîn Tanrikuluyî derheqê mesele de vernîyazêkê persî dabi Wezîrê Pawitişî û Serekê artêşa tirke Hulusî Akarî.

Akarî ke cewabê  vernîyazî da, serebût înkar kerd û îdîa kerd de derheqê serebûtê winasênî de qet yew dokument û qeyd çin o.

Sezgînî vat: ''Têna pê çekuyêke cewab dîyayo. Çew/e vano qey ûca operasyon nêbîyo û helîkopterê na dewlete nîyo. Çekuya Akarî nêzdîbîyayîşê hukmatî yê heqanê merdiman ramojneno. Qet nêvano ma ma cipêrsayîş zî dayo destpêkerdene. Çunke oyo ke merd kurd o.''

Îşkenceyê bi helîkopterî ra dima Servet Turgutî dinyaya xo bedilnabi. Xebera muxabîranê Ajansê Mezopotamya Adnan Bîlen, Cemîl Ugur, muxabîra Jinnewsî Şehrîbane Abî û Nazane Sal ra dima vejîyabi werte. 4 muxabîrî zî 9ê teşrîna verêne de tepişîyaybî.