Li bajarê Hesekê yê Rojavayê Kurdistanê ava Wêstgeha Elok a ku di bin kontrola grûpên çekdar ên girêdayî Tirkiyê de ye, li Serê Kaniyê qut bûye. Hikûmeta Tirkiyê û grûpên çerkdar ên sre bi Tirkiyê, ev çendîn car e ava Wêstgeha Elok ji ser bajarê Hesekê û gundewarê wê birriye.

Ev 4 roj in ava Wêstgeha Elok a ku di bin kontrola grûpên çekdaran de ye li Serê Kaniyê li ser Heseke qut bûye û li gor xelkê, av ji dema du heftiyan ve kêm bûye û li hinek cihan jî qut bûye.

Ji ber vê yekê xelk neçar dibe ku tankerên avê yê 5 bermîl, bi 5 hezar lîreyên Sûrî dagire.

Beşeke din a xelkê sûdê ji bîrên ku wan bi xwe kolane werdigirin lê bi kêrî vexwarin, xwarin  nayê.

Ev yek di demekê de ye ku niha li Heseke û Qamişlo, Reqa û Tebqa ji ber tedbîrên belavbûna Coronayê çûn û hatin qedexe ye û metirsî heye nebûna avê, bibe sedem ku xelk pabendî qedexeyê nebe û bo peydakirina avê derkevin.

Krîza avê ji 2013an li bajarê Hesekê heye, lê piştî kontrolkirina Wêstgeha Elok a li Serê Kaniyê ji aliyê girûpên çekdar yên girêdayî Tirkiyê ve rewşa avê bi yek carî kambax bûye.

Wêstgeha Elok dikeve 10 kîlometriya rojhilatê bajarê Serê Kaniyê û ji 30 bîrên avê pêk tê, ku çavkaniya sereke ya ava Heseke û derdora wê ye.

Ji Cotmeha 2019 ve ku bajarê Serê Kaniyê ketiye bin kontrola artêşa Tirkiyê û komên çekdar ên girêdayî wî welatî, gelek caran ava wêstgeha Elok li ser bajarê Hesekê û gund û bajarokên derdorê yên di jêr desthilata Rêveberiya Xweser a li Rojavayê Kurdistanê de hatiye qutkirin.