Navenda Nûçeyan - Têkildarî rewşa Demirtaşî, dadgehê dîyar kir ku girtina Demirtaş demeke maqûl derbas kirîye û biryar da ku di derheqê wî de li gor madeya 19 a Destûra Tirkîyê, binpêkirin hatîye kirin.

Dadgehê herwiha biryar da, ku hikûmet 50,000 Lîreyên Tirkîyê tezmînata manewî bide Demirtaş.

Demirtaş li ser doza derbarê bûyerên 6-8 Cotmeha 2014an yên têkildarî Kobanîyê de, cezayê zîndanê lê hatibû birîn. Dema cezaya Demirtaş, li gor brîyara dadgehê ji roja 4ê Mijdara 2016 ve destpê kir û li gor biryara dadgehê di 2ê Îlona 2019an de bi dawî dibû, lê tevî bidawîbûna dema girtina wî, Demirtaş nehat berdan û heta niha jî di zindanê de ye.

Dadgeha Destûrê ya Tirkîyê derbarê serlêdana Demirtaş a têkildarî lêkolîna girtina wî de biryar da, ku ev yek ne erka wan e.

Herwiha dadgehê serlêdanên Demirtaş ên bo daxwaza berdanê û îtîraza li dijî girtîbûna xwe ku biryar li ser nehatibû dayîn, bi sedema ku serlêdana jibo wê yekê ya bo Dadgeha Bilind di dema xwe de nehatîye kirin, red kirine.