Dewa Goktepe ya girêdayeyê qezaya Mazgêrî ya Dêrsimî de 22ê êlule de wesayîtê leşkerî yê zirxî dabî ciwano kurd yê bi nameyê Oktay Ero 22 serrî ro û Erî cuya xo vindî kerdbî. Cenazeya Erî badê otopsî dîya keye û perê dewa Çîmenlî ya qezaya Mazgêrî de ameye definekerdene.

Mewkîyê dewa Goktepe ya girêdayeyê qezaya Mazgêrî ya Dêrsimî de 22ê êlule de wesayîtê leşkerî yê zirxî dabî ciwano kurd yê 22 serrî Oktay Erî ro û Erî hedîse de cuya xo vindî kerdbî. Cenazeya Erî perê dewa Çîmenlî ya girêdayeyê qezaya Mazgêrî de bi hesiran ameye definkerdene. Otopsîya cenazeya Erî Meletî de ameye kerdene û badê ardî Dêrsim bi merasîmêk amey definkerdene. Derheqê babete de pîyê Oktay Erî ke cuya xo vindî kerd Cebraîl Erî qisey kerd. Cebraîl Erî da zanayene ke şewa 22ê êlule de saet dormeyê 20.00î de xebere dîyaya înan ke lajê ci qezayê trafîkî kerdo. Cenazeya lajê mi nizdîyê 2 saetan paweyê ameyîşê dozgerî ame vindetene û va: “Dozger cigêrayîş kerd û dima ra cenaze erşawit Mazgêrî. Uca de ma rê vatî ‘Wesayîtê cenaze çin o’ û wesayît nêdayî ma. ma uca ra cenaze seba otopsî berd Meletî..”

‘Cayê qeza hîra yo’

Pî Erî dîyar kerd ke lajê ci aye roje seba hetkarîya embazê xo şîbî û wina dewam kerd: “Dim ara lajê mi û embazê xo şonî werd. Badê ke lajê mi vejîyeno wazeno ke şêro embazêk xo bivîno. Lajê mi embazê xo rê vano ‘Ti tîya de vinder. Ez do lokantaya hemverê ma de embazêk xo bivîna û bêra.’ Lajê mi wexto ke şono hemverê rayîrî wesayîtê leşkerî dano piro. Rayîr hîra yo û 4 şerîd o. Senî lajê mi ferq nêkerdî. Wesayîto ke da piro bi teknolojîyê tewr peynîyan ameyo viraştene. Zerreyê ci de kamera, çilaya roşnkerdişî û mesafeya vernîya xo esto. La reyna zî ci qelibîya.”

‘Ê nêeşkenî mi bixapênî’

Erî da zanayene ke o bi xo zî şoforê TIRî yo û va: “Wexto ke ez biwaza ez eşkena no wesayîtî her ca de bida vindetene. Nêvindetişê wesayîtî af ecêbin o. Senî rayîrê 4 şerîdî ser de lajê mi nêdî. Mi qasê emrê înan şoforî kerdo. Ê mi xapênenî. Wa wesayîtanê leşkerî yê Dêrsimî kontrol bikerî. Xizê mîyanê bajarî 30 yo û xizê teberê bajarî yê sey otobanî zî 60 o. Ê neşkenê mi bixapênî.”

’28 metre ameyo kaşkerdene’

Erî dewamê qiseykerdişê xo de va: “Mîyanê Dêrsimî wesayîtê zirxî bi xizê tewr girdî yenî ramitene. Bi xizê 80-90 kîlometreyî dayî lajê mi ro û kiştî. Xişîman ardî û kerdî şofor. Nê cayan de canê doman û merdiman herînenî. Her cayê lajê mi de şikitişî estbî. Wesayît tena piro nêdabî, xo dima 28 metre wesayît dima kaş kerdbî. Ez vana ke sebebê mergê lajê mi dewlet a. Ez do peynîya hedîse vera nêda.”

‘Mi gerre kerd’

Erî tewr peynî wina va: “Şoforê wesayîtî ameyo tepiştene, labelê derheqê ci de malulatî zelal nîyî.  Îfadeyê embazê lajê mi zî girewtî. Mi gerre kerd. Ez do avûkat bitepişa û doze reyde eleqedar biba.