“Bakûr, Piştgirê Referandûma Serxwebûna Başûr e!”

Di 15. 07.2017an de li ser banga Hereketa AZADÎ, PAK, PDK-Bakur, PDK-T, ÖSP, PSKyê, li Diyarbekirê bi beşdariya hin partî û grûbên siyasî, saziyên sivîl û şexsiyetên serbixwe, “Komxebata Referanduma Serxwebûna Kurdistanê” hate li darxistin.

A+A-

Roja 15.07.2017an li Amadê, di Hola Plaza Hotêlê de, bi banga Herekete Azadî, PAK, PDK-Bakur, PDK-T, PSK û ÖSPyê ji bo ‘’Referandûma Serxwebûne Kurdistanê“ komxabatek hat li dar xistin.

Rojev, bi xeberdana endamê komisyona amadekar Bayram Bozyel dest pêkir.

Paşê dîwan pêk hat.

Ji bo birêvebirina vê xomxabatê Feyyaz Ekmen, Nusreddin Maçin û Sabri Soysal hatin qabûl kirin.

Beşdarê civînê, Ji bo şehîdên Kurdistanê , daqîqeyêkê rêzgirtin.

Serokê dîwanê Feyyaz Ekmen , di destpêkê de bi kurtayî li ser girîngîya’’Referandûme Serxwebûna Kurdistanê“ axiftınek kır.

Ji dervayê Hereketa Azadî, PAK, PDK-Bakur, PDK-T, PSK û ÖSPyê; gelek dezgehên sivîl, rewşenbîr û kesayetên serbixwe beşdarî vê komxabatê bûn.

Komxabat ji sê rûniştinan pêk hat.Di rûniştina yekem de , serokên partîyan fikir û ramanên xwe ji beşdarên civînê re beyan kirin. Li ser navê Hereketa Azadî Ayetullah Aşitî, li ser navê PAK ê Mustafa Özçelîk, li ser navê PDK-Bakur Sertaç Bucak, li ser navê PDK-T`yê M. Emin Kardaş, li ser navê PSK yê Mesut Tek û li ser navê ÖSP`yê Sînan Çîftyürek axiftinên xwe kırın.

Di rûniştina duyem de beşdarên komxebatê axivîn. Gelek beşdaran bîr û rayên xwe yên li ser ‘’Referandûma Serxwebûna Kurdistanê“ anîn ziman û ji bo xabata referandûmê pêşnîyarên xwe pêşkêş kirin.

Di rûniştina sêyemde, reşnivîsa encamnameya komxebatê hate pêşkêş kirin û hat nîqaş kirin. Di vê xalê de, beşdarên komxabatê pêşniyarên xwe yek bi yek bi lêv kirin. Encamname li gorî pêşniyaran hate serast kirin û hate qebûl kirin.

Di dawîya komxebatê de biryarek hat sitandin ku Însîyatîfek bê hilbijartin. Ev insiyatîf, wê bernameya kar û barên xabata ‘’Referandûma Serxwebûna Kurdistanê“ tesbît bike û dê birê ve bive.

Ji bo birêvebirina vê Însîyatîfe , li ser navê, Partî, dezgehên sivîl û kesayetên serbixwe 13 kes hatin hilbijartin.

İnsîyatîfa ku hatibû hilbijartin li ser navê Komxebatê di roja 16.07.2017an de li Amedê li Cemîyeta Rojnamevanan civîneke çapemenîyê li dar xist.

Civîna çapemenîyê bi beşdarîya nûnerên çapemenî û ragehandinê, rêveber û endamên partîyên sîyasî, sîyesetvan û rewşenbîrên bakurê Kurdistanê li dar ket.

Di civîna çapemenîyê de li ser navê Însîyatîfê Cîhgirê Serokê Giştî Yê PDKT`yê Şerefxan Cizîrî bi Kurdî, Serokê Giştî yê ÖSP`yê Sînan Çiftyürek jî bi Tirkî Encamnameya Komxebatê xwendin.

16.07.2017

JI MEDYA Û RAYA GIŞTÎ YA KURDISTANÊ Û CÎHANÊ RE

“Bakûr, Piştgirê Referandûma Serxwebûna Başûr e!”

Di 15. 07.2017an de li ser banga Hereketa AZADÎ, PAK, PDK-Bakur, PDK-T, ÖSP, PSKyê, li Diyarbekirê bi beşdariya hin partî û grûbên siyasî, saziyên sivîl û şexsiyetên serbixwe, “Komxebata Referanduma Serxwebûna Kurdistanê” hate li darxistin.

Di Komxwebatê de biryar hate girtin ku encamnameya li jêr ji raya giştî re bê belav kirin.

Wek tê zanîn demek dirêje ku pirsa referandûma serxwebûnê di rojeva Başûrê Kurdistanê de bû. Nîhayet di 7ê Heziranê de, bi pêşengiya Serokê Herêma Kurdistanê Rêzdar Mesûd Barzanî, partiyên başûrê Kurdistanê biryar dan ku ji bo serxwebûnê di 25ê Îlonê de herin “Referandûmê.”

Em biryara referandûma serxwebûnê gaveke dîrokî, rasteqîne, pêwîst û pîroz dinirxînin.

Em beşdarên vê Komxebatê bi her awayî alîgir û piştgirê biryara gelê xwe yê Başûr in.

Her weha di derbarê referandûma serxwebûnê de,em banga alîkarî, çavdêrî û piştgiriyê li Netewên Yekbûyî, li Yekitîya Ewrûpa, li Konferansa Îslamê û li hemû dewlet û gelên cîhanê dikin.

Em banga nefsul-qiyasê, empatî û îhtiramê li gel û dewletên cîran; Tirkiye, Îran, Iraq û Sûryê jî dikin.

Biryara “Referandûma serxwebûnê”, di têkoşîna azadîya miletê Kurd û gelên Kurdistanê da gaveke dîrokî ye.

Ev gav, encama têkoşîn û xebateke dirêj e. Bedêla xwîna bi deh hezaran şehîd û lehengên bi nav û bênav e. Bi cihanîna xewna Ahmedê Xanî, wesiyeta Qadî Mihemed ya Mele Mustafa Barzanî ye. Gelê Kurdistanê bi keda xwe, bi îradeya xwe gihiştîye vê merhaleyê.

Biryara referandumê ji nuha ve him li Kurdistanê û him jî li seranserê dinyayê deng vedaye.

Biryara referandûma serxwebûnê çawa ku li çar parçeyên Kurdistanê coş û kelacen peyda kiriye, ewqas jî ketiye rojeva dinyayê.

Şik tê de tuneye ku “Referanduma serxwebûnê” wê li Rojhilata Navîn hemî dengeyan biguherîne. Piştî referandumê doza azadiyê wê li çar parçeyên Kurdistanê bigihêje qonaxeke nû. Pêvajoya serxwebûnê wê guhartinê li ser hemî dewletên derûdor ferz bike.

Pêvajoya 26 salên borî nişan dide ku Herêma Kurdistanê, li gel hemû astengî û pirsgirêkan jî, ji dewletbûnê re amade ye. Gelê başûrê Kurdistanê di warê xwe bi xwe idarekirinê da xwedî îrade û tecrubeyeke erêni ye.

Yek ji giringiya referandûma serxwebûnê jî ev e: Referandûm ne tenê di nav sinorên resmi yê Herêma Kurdistanê da, li ciyên daxilî madeya 140î yên wek Kerkûk, Şingal û cîhên din de jî dê çêbibe. Bi gotinek din, di 25ê İlonê de wê him îradeya serxwebûna Kurdistanê derkeve holê, him jî dê yekpariîya başûrê Kurdistanê pêk were.

Em wek parti, saziyên civatî û şexsiyetên serbixwe yên Bakurê Kurdistanê; bangî hemî dewlet û dezgehên cihanê dikin;

Rêzgirtina li referandûmê û li îradeya serxwebûna Başûrê Kurdistanê, him pêdivîyeke ehlaqî û wîcdani ye, him jî jibo aramî û aşitîya herêmê merceke esasî û giring e.

Kurdistana serbixwe, li herêmê wê bibe bingeha pêkvejiyanê, demokrasiyê, cîhê toleransê, nimûneya pir partîtîyê û garantîya mafên hemû etnîtîsîte, ol û mezheban.

Li aliyê din, em wek partiyên siyasi, dezgeyên sivil û şexsiyetên xwedî fikrên cuda; jibo biryara “Referandûma Serxwebûnê” di serî da Serokê Herêma Kurdistanê Rêzdar Mesûd Barzanî, hemî dezgeh û partîyên Başûrê Kurdistanê û gelê me yê Başûr pîroz dikin. Lê di heman demê de jî em bang li wan dikin ku di demeke wisa hesas de yekîtî û tifaqa xwe hîn xurtir bikin. Em zanin ku hêza me ya herî mezin tifaqa me ye, birîna me ya herî kûr jî bêtifaqî ye. Ji bo ku di referandûmê de serxwebûn bi asteke herî bilind bê erêkirin, tifaq pêwîstîyeke esasî ye.

Ji bo çareserîya pirsgirêkên navxweyî yên Başûrê Kurdistanê yên aborî, sîyasî û îdarî, divê bernameyeke berfireh bê amade kirin.

Lê divê referandûm nebe qurbana pirsgirêkên navxweyî.

Em bi taybetî jî bangî gelê me yê Başur dikin ku di 25ê İlonê de herin ser sindoqan û ji bona sexwebûnê hemî bi yek dengî bêjin ‘erê’’.

Bangawaziyek me jî, li tevaya gelê Kurdistanê û Kurdistanîyên li cîhanê ye.

Divê li her çar aliyê Kurdistanê û diyasporayê gelê Kurdistanê rabe ser piya û li hember erîşên li ser Hêrêma Kurdistanê xwe bike mertal. Divê îradeya serxwebûnê ne tenê li Başûr, li seranserê Kurdistanê û bi awayeke xurt derkeve holê.

Divê em nîşanî herkesî; dost û hemberên xwe bidin ku Başurê Kurdistanê ne bi tenê ye. Di rastiyê de referenduma ku çêdibe ya her çar parçeyê Kurdistanê ye.

Komxebata me ji bo piştgirî û xwedî lêderketina “Referandûma Serxwebûna Başûrê Kurdistanê” bi dengekî hevpar, pêwîstîya li dar xistina konferans, semîner û çalakîyên cûr be cûr tesbît dike. Herweha girîngîya danûsitendinên bi alîyên sîyasî, sivîl û medyaya Tirkîyeyê û dewletên cîhanê jî hate pejirandin.

Ji bo birêvebirin û organîze kirina xebata piştgirîya referandûma serxwebûnê , Însîyatîfek ku ji 13 kesan pêk tê hatiye hilbijartin. Însîyatîfa ku ji nûnerên partîyên sîyasî, yên dezgehên sivîl û şexsiyetên serbixwe pêk hatîye, li gorî pişniyarîyên beşdarên Komxebatê dê bernameyeke xebatê çêbikin.

Bername û nexşe rêya vê xebatê wê di rojên pêş de bi medya û raya giştî re were parvekirin.

16.07.2017/Diyarbekir

Li ser navê Însîyatîfa ji alîyê Komxebatê ve hatîye hilbijartin,