Derengiya şeva borî, balafirên şer ên Tirkiyê, du gundên sînorê Zaxoyê bombebaran kirin û wesayîteke PKKê kirin armanc. Wezareta Berevaniya Tirkiyê jî dibêje, di êrîşekê de li bakurê Iraqê 11 gerîlayên PKKê hatine kuştin.

Li gor zanyariyan, nêzîkî gundê Banka Jor û Banka jêr ên li sînorê Zaxoyê hatin bombebarankirin û zerarên êrîşê heta niha nehatin zanîn. Lê ji ber bombebaranê, elektrîka her du gundan hatiye birîn û camên pencereyên hin malan şikestine, herwiha tu zerareke canî çênebûye.

Bi twîtekê, Wezareta Berevaniya Tirkiyê daye zanîn, li Heftanîn û Zapê li “Bakurê Iraqê” piştî çavdêrîkirin û keşfa li herêmê, di encama operasyoneke esmanî de, 11 gerîlayên PKKê hatine kuştin.

PKKê di derbarê vê êrîşa esmanî de, hêj tu daxuyanî nedaye.