Merkezê Xeberan - Baroya Amedî, bi munasebatê Roja Ziwanê Maye, Salona Konferansî ya Tahîr Elçî de panele organize kerd û aşkere kerd ke binê banê baro de komîsyonê Ziwanê Kurdkî ameyo ronayene.

Moderatorîya panelî avukat Şêxo Fîlîkî kerd û Nuştoxe Nadîre Guntaş Aldatmaz, Nuştox Selîm Temo û avukat Mehmet Emîn Aktar zî sey panelîst beşdarê panelî bîyî.

Panel de her panelist bi lehçeya xo qisey kerd.

La destpêkerdişê panelî ra ver, baroya Amedî aşkere kerd ke hetê baroya Amedî ra Komîsyonê Ziwanê Kurdkî ameya ronayene.

Dima ra panel dest pêkerd.

Nuştoxe Nadîre Guntaş Aldatmaz panelê Baroyê Amedî de qisey kerd û bala ante ser ke ciwanê kurdî hema hema tewr kirmanckî qisey nêkenê.

Nuştoxe Nadîre Guntaş Aldatmaz qiseykerdişê xo bi Kirdkî (Zazakî) kerd û wina va: ''Netîceyê anketan mojnenê ma ke mabênê ciwanan û kalanê 50 ra pîlêran de hetê qiseykerdişê kirmanckî ra cîyatîya pîle esta. Ciwanî hema hema tewr kirmanckî qisey nêkenê. Destê ma de doneyê seba xebitnayîşê kirmanckî çin ê, coka ma cigêrayîşanê UNESCOyî seba xo referans gênê. Xebatanê peyênan ê anketan de ma dî ke ciwanî babîyanê xo reyde ney, hîna zêdêr dadîyanê xo reyde kirmanckî qisey kenê. No mojneno ke cinîyî seba aqîbetê ziwanî cayêkê senî girîngî gênê.''

Nuştox Selîm Temoyî zî vist vîrî ke ganî kurdî ziwanê xo sey parçeyêkê ruhê xo bivînê.

Avûkat Mehmet Emîn Aktarî zî ard ziwan ke ganî her kurd seba perwerdeyê bi kurdkî muracatê mehkemeyanê mîyanneteweyîyan bikerê û seba nê heqê xo têkoşîn bikerê.

Panelî ra dima mezunan rê sertîfîkayê kursê ziwanî yê Baroyê Amedî ameyî vilakerdene.