Merkezê Xeberan- Keyeyê wendekara Unîversîteya Munzurî Gulîstane Doku ya ke hewteyêk o ci ra xebere nîna girewtene Baroyê Dêrsimî de eşkerayîyêke da û selahîyatdaran ra waşt ke wa zanayîşêko qetî înan dir pare bikerê.

Eşkerayîya ke waya Gulîstane Doku Aygule Doku û merdimê ci û Serekê Baroyê Dêrsimî Kenan Çetîn beşdarê ci bîyî de waye Doku îzeh kerd ke, derheqê waya ci de zanayîşo hîra çîn o û va, tena yew meqesêkê ci Pirdê Dînarî de ame diyene. Bê nînan çîyêk ma deste de çîn o. Aygule Doku selahîyatdaran ra waşt ke wa zanayîşo qetî bi înan pare bikerê û veng da şarî ke seba vînayîşê Gulîstane paştî bido înan.

Serekê Baroyê Dêrsimî Kenan Çetînî zî va, na meseleyêka hesas a. Coka ganî bi zanayîşê qetî bêro têgêrayene.  Ma pîya bi keyeyî reyna muracatê Serdozgerîya Komare ya Dêrsimî kerd ke wa newe ra Zainal Abarakovî tepişnê û îfadeyê keyeyî newe ra bigêrê. Ma derheqê qiseykerdişê 4 sanîyan ê telefonî de zî eleqedaran rê  nuşteyî şawitî, ganî çend rojan de netîceyê ci bêro eşkerakerdene.