Meclîsa Beledîyeya Dêrsimî qerar girewt ke tebeleya Beledîyeya Dêrsîmî ke ser o ‘Tunceli Beledîyesi’ nusîyaya bivurno û biko ‘Şaredarîya Dêrsimî’ 

Meclîsa Beledîyeya Dêrsimî qerar girewt ke tebeleya Beledîyeya Dêrsîmî ke ser o ‘Tunceli Beledîyesi’ nusîyaya bivurno û biko ‘Şaredarîya Dêrsimî’ Endamê Meclîsa Beledîyeya Dêrsimî seba tabeleya Beledîyeya Dêrsimî kom bîy.
Peynîya kombîyayîşî de endamê Meclîsa Beledîye qerarê xo da û netîceyê qerarî de êdî tabeleya Beledîyeya Dêrsîmî de herinda ‘Tunceli’ de do ‘Dêrsim’ bêro nuştene. Qerarê Meclîse de wina ame vatiş: Ma qerar dayo ke tebelaya beledîye ser o herinda ‘Tunceli’ de ‘Dêrsim’ bêro nuştene. No qerar, gorê qîmet û kulturê Dêrsimî amo dayene.

Wexto ke Beledîyeya Dêrsimî rê hetê hukmatê AKP ra qeyûm ame tayînkerdiş tabeleya Beledîyeya Dêrsimî ser o xora ‘Dêrsim’ nuştebi la qeyûmî tabela vurnabi û tabela ser o ‘Tunceli’ nuştbi.  Bi qerarê meclîse do tabela ser o newe ra ‘Dêrsim’ bêro nuştiş.  

Heto bîn ra Meclîs Beledîyeya Dêrsimî qerar da ke Festîvalê  Xoza û Kulturî organîze bikero. No festîval zî demê qeyûmî de amebi yesaxkerdiş. Festîvalê Dêrsimî do emser mabênê 25, 26, 27 û 28ê Temuze de bêro vraştene. Meclîsa Beledîyeya Dêrsimî yewna qeraro muhîm girewt ke xizmetê beledîye do ewro ra tepîya Kurmancî û Zazakî bêrê dayene.