Parlamentoyê Kantonê Bernî qerar girewt ke do hinda hayîdarîyê fermîyî bi lehçeyê kurmanckî yê kurdkî zî bêrê kerdene.

Komeleya Kulturî ya Bernî, Komeleya Kulturê Elewîyan a Bernî û Komeleya Paştdayîşî ya Kurdan û Tirkîyan a Swîsre pîya Kantonê Bernî de îmzayî arêdayî ke wa parlamentode kurdkî zî bêro şuxulnayene. Netîceya nê de Bern de hayîdarîyê fermîyî do kurdkî zî bêrê kerdene.

Verî ke qerar bêro girewtene aktîvîsta kurde Yeşîme Ekîcî derheqê waştişê înan de qisey kerd. Dima ra patîyanê ke grûbê înan est ê bi nameyê înan qiseykerdişî ameyî kerdene. Badê qiseykeridişan reydayîş dest pêkerd. Reydayîşê parlamentoyî de 64 kesan qebul kerd, 4 kesan red kerd û 3 kesê zî bêqerar mendê. Seba ke reydayîş hol ravêrt grûbêka kurdîstanijan ke parlamento de reydayîş teqîpkerdene pê çapikan parlamentoyî rê spas kerd.

Aktîvîsta kurde Yeşîm Ekîcî ard ziwan ke ê xeylêk wexto na xebete kenê û vat: ''Zaf muhîm o ke kurdî bi zwanê xo bêrê temsîlkerdene. Bi serran o kurdî hayîdarîyanê bi tirkî, erebkî û farskî rê mecbûr manenê.''  Ekîcî vist vîrî ke qerar pê reyanê zafan ameyo qebulkerdene û heme partîyanê ke paştî dayo, înan rê spas kerd.

Hemserekê Enstituyê Kurdan ê Swîre Cemal Ozçelîkî zî semedê qerarî keyfweşîya xo ard ziwan û vat xebatê semedê kurdkî do dewam bikerê.

Pê nê qerarî ke ame girewtene hinda Kantonê Benî de do hayîdarîyê muhîmî bi lehçeyê kurmanckî yê kurdkî zî bêrê kerdene.