Bernameyê Festîvala Kultur û Xoza ya Munzurî ya ke do 21ê temmuze de bêro despêkerdene, ame eşkerakerdene.

Bernameyê Festîvala Kultur û Xoza ya Munzurî ya 20. ame eşkerakerdene. Festîvale emser do bi şîarê 'Ma vera talanê madenan xoza, vera talanî cuye, vera qedexeyan hunerî pawenê' û serkêşîya Federasyonê Komeleyanê Dêrsimî (DEDEF), Hêzanê Demokrasî û Kede yê Dêrsimmî û Şaredarîya Dêrsimî de bêra kerdene.

DEDEF, Hêzanê Demokrasî û Kede yê Dêrsimî û Şaredarîya Dêrsimî derheqê festîvale de pîya eşkerayîye daye. Serekê DEDEFî Ozcan Tacerî eşkerayîye de qisey kerd û da zanayene ke 2 serrî janî ra semed festîvale nêameye kerdene, naye ra ber 22 serrî yo bêmabên na festîvale yena kerdene. Tacerî vat: ''Festîvala Munzurî 22 serrî yo bêmabên dewam kena. Festîvala ma vera pêro qedexeyan, goreyê krîteranê demokratîkan do bêra kerdene. Festîvala ma do bi yadkerdişê Munzur Babayî dest pêbikera.''

Bernameyê festîvale wina yo:

-21ê temuze: Meydanê Seyîd Rizayî de do meşaleyê festîvale bêro tavistene. Ekîba Şaredarîya Dêrsimî û Varvara kayî bimojnê. Meydanê Seyîd Rizayî de standê ekolojî do bêrê akerdene. Kargehê resiman ê domanan do bêro akerdene (15.00 - 23:00). Derheqê têkoşînê cinîyan de panelêk do bêro kerdene û dima Koma Sarya do vejîya sehne ser (16.00-19.30). Stadyumê Dêrsimî de konserêk do bêro dayene, konserî ra verî Hemsereka HDPyî Pervîne Buldan, Serekê DEDEFî û Şaredarê Dêrsimî Mehmet Maçoglu do qisey bikero.  Konser de Koroyê Domanan, Ozan Serdar (Zulkuf Engîn), Rewşane Çelîker, Grup Yorum, Grup Îsyan Ateşi û Grup Vardiya do vejîyê sehne ser. (19.30-24.00)

-22ê temmuze: Kuçeyê Hunerî de hozanê şarî do bêrê yadkerdene (13.00-16.00). Panelê 'Çarçewa Têdûştî, Azadîye û Demokrasî de Rewşa Sîyasî û Erkê Ma' do bêro dayene (16.30-19.30). Meydanê Seyîd Rizayî de Koroyê Domanan, Dogan Çelîk, Hidir Bakir, Şenol akdag, Musa Bakî, Rûkene Yilmaz do vejîyê sehne ser (19.30 – 23.30). Dokumenterê 'Ustu Altindan Degerli' do bêro mojnayene (21.30- 22.30).

-23ê temmuze: Aktîvîteyê domanan (11:00 -20:00). Kuçeyê Hunerî de panelê 'Çarçewa Elewîtîye de Hemwelatîya Têdûşte' do bêro dayene (12.00 -15:00). Panelê 'Ber be ber Kılamê Kirmancîye' do bêro dayene (15.30 – 18.00). Platformê Demokrasî û Kede yê Dêrsimî vera talanê xo, asîmîlasyon û qirkerdişê xoza rayraşîyayîşêkî do bikero û dima eşkerayîya çapemenîye bido (18.30-19:20). Meydanê Seyîd Rizayî de goşdarîkerdişê muzîkî (19.30- 23.30). Dokumenterê 'Domanê 38î' do bêro mojnayene (21.30 - 22.30). Qezaya Xozatî de panel û konser do bêrê kerdene.

-24ê temmuze: Panelê 'Huqûq, Demokrasî û Heqanê Merdiman' (13.00- 15.00). Panelê 'Tehlukeyanê projeyanê madenî yê Dîcle-Firatî' (16.00 – 18.00). Koro, Grup Gundogarken, Haydar Bayar, Ayşe Tutuncu, Grup Munzur, Metîn Kemal Kahraman, Mîkaîl Aslan do vejîyê sehne ser (19.30-24.00)