Berpirsên hikûmeta Kurdistanê û şandeka NY li ser çawaniya nehîştina gendeliyê civiyan.

Serokê desteya destpakî ya Herêma Kurdistanê, Ehmed Enwer ragihand, îro li Hewlêrê şandeka dezgeha nehîştina gendeliyan ya NY (UNDP) û bi beşdarbûna şanda desteya destpakiyê, wezîrê dad yê Kurdistanê û şanda encumena dadwerî ya Kurdistanê civiyan.

Ehmed Enwer da zanîn, di civînê de behsa wê yekê hat kirin ku çawa gendelî nemîne û mekanîzek bo wê yekê were danîn.

Serokê desteya destpakiyê anî ziman, niha li Herêma Kurdistanê dest bi çaksaziyê hatiye kirin lê hîn jî gendelî heye û metirsîdar e jî, ji ber wê jî divê xebatek cidî were kirin.

Ehmed Enwer da xuyakirin, dê sibê amarên desteya destpakiyê li ser gendeliyê belav bikin.