Wezaretîya Weşîye ya Lubnanî aşkere kerd ke, heta nika tewr tay 137 kesî teqayîşê Beyrûtî de merdê û 5 hezar kesî zî birîndar bîyî.

Roja sêşemeyî lîmanê Beyrûtî de teqayîşêko pîl qewîmîya. Bîlançoya teqayîşî vera-vera bena giran. Gorê selahîyetdaranê Beyrûtî teqayîş de 300 hezar kesî bêkeye mendî û zeraro madî zî 3 heta 5 mîlyar dolar o.

Teqayîşî ra ver zî Lubnan de krîzê ekonomîk û sîyasîyî estbî. Welat de bi rojan çalakîyê vera hukmatî ameyêne kerdene. Lubnan de domanî binê şert û mercanê giranan de ciwîyenê û pêro berhemê werdî teberî ra yenê erînayîş. Pereyê Lubnanî bi taybetî aşma êlule ra nat qîmetê ci kêmîya. Welat verê krîzê enflasyonî de yo.