Weşanxaneyê Peywendî ra kitabêko kirdkî vejîya. QEREBEGAN, Tarîx, Kultur, Coxrafya. Kitab hetê nuştoxe Pervîn Septîoglu ra nusîyayo.

Peynîya kitabî de wina nuseno: Tarîx, kultur û coxrafya semedê şinasnayişê yew şarî nîşaneyê erjaye yê. Na xebate xo de nuştoxe bi tarîx, kultur û coxrafya yew cayê muhîm ê zazayan dan şinasnayiş, Qerbegan yan zî bi nameyo bîn Mîyaran. Metodolojîyê xebate zî gelêk muhîm a. Zafê malumatê xebate fekê şarê Qerebegan ra ameyê girewtiş. Malumatê fekkî çimeyê yewin ê xebatanê îlmî yê. Na xebate de tarîx, coxrafyayê mintiqa ra heta ziwan, sonik, meseleyî, efsaneyî, werdê şarî ra ameyê vatiş. Merdim wexta ke nê rezan waneno vano qey şîyo Qerebegan û şarî de qisey keno. Heto bîn ra xebate semedê xebatkaranê kultur û ziwanî zî yew çimeyo muhîm o.

Pervîn Septîoglu kam a: Pervîn Septîoglu serra 1979 de qezayê Erzûrim Xinûs de ameya dinya. Eslê xo Pali ra ya. Mektebo vêrîn, mîyanîn û lîse Erzûrim di wenda. Zewacê xo ra dima şîya Pali. Serra 2013 de kewta îmtîhanê unîversîte. Unîversîteyê Çewlîgî de qismê Edebîyat û Ziwanê Kirdkî (Zazakî) wenda û bi yewinî qedêna. Dima ra serra 2017î de qismê Zazakî de lîsanso berz qezenc kerda û nika zî tezê xo ser o xebate kena. Çend nuşteyê aye zî kovara Vîr de neşir bîyî. Ziwanê dayikî yê aye kurmancî yo. Zewacê xo ra pêy zazakî musaya. Yew laj û di kênayê aye estî. Çewlîg di ciwîyena. Kovarê Unîversîteyê Çewlîgî de yew maqaleya aye neşir bîya.
 

Çime: Kirdki.com