Kitabê bi nameyê "Ti Tewrê Payîza Şîya" hetê Îrfan Akdagî ra ameyo nuştiş, muhtewaya ey roman a. No kitabê nuştoxî yo yewin o. Kitab hetê Weşanxaneyê Peywendî ra ameyo çapkerdene û 272 rîpel o. 

Daşinasnayîşê kitabî de wîna ameyo nuştene. 
“Ti Payîza Şîya” yew romano pastoral o. Bi nê xususîyetê xo zazakî de romano verîn o. Hediseyê romanî cuya koçeran ser o yê. Heşt keyeyî omidê xo erzenî paştîya xo û semedê nanê xo kuwenî rayîr. Emrê înan koyanê welat de vîyarto. Koyan de pes weye kenî û ware de xeyman de manenî. Tay dewijî zî nêwazenî koçerî bêrî ware û inan rehet veranêdanî. Cuya wareyî çetin a. Koçerî yew heta mîyanê zehmet de ewnîyenî gureyê xo ra û yew heta zî vera tay dewijan mucadele kenî.
Hediseyo sereke yê romanî heskerdişê Wisif û Asme yo. Yew roja amnanî binî qorçiyêr de yewbînî vînenî. Zerr kuwenî yewbînan. Wisif koçer o, Asme şaristanan de bîya pîl. Qeder înan binî qorçiyêr de ano yewca. Şima no roman de xo ware de hîs kenî û tewrê koçeran ware de cuyenî, xeyal, hevî û eşqê Wisif û Asme wanenî. Wisif û Asme seba resayişê yewbînanî xeyalanê xo dima şenî.
Mucadeleyê koçeran, eşqê Wisif û Asme pey yew ziwano zelal û edebî ameyo nuştiş. Roman de tabiat, cografya, nameyê cayan û îdyomî zaf rind ameyî şuxulnayiş. Heto bîn ra roman de derheqê kulturê wareyî de sere ra heta peynî heme çî esto.