Roja 07.03.2020î Amed de Mela Mistefa Barzanîyo nêmerde bi beşdarîya xeylê kesan ame yadkerdene.

PAK û PSK kombîyayîş organîze kerdbî, la HAK-PARî zî hetkarî da ci û xeylî îdarekar û endamê HAK-PARî, potansîyelê PDKyî, xeylî tradîsyon û hetî ê Kurdistanî, roşnvîrî û sîyasetmedarê Kurdî beşdarê yadkerdişî bîyî.

Televîzyonê Kurdî eleqeyêka weşe nîşanê yadkerdişî day.

Kombîyayîş bi marşê Ey Reqîb û seba şehîdanê Kurdistanî rêzgirewtiş dest pêkerd.

Nameyê organîzasyonê yadkerdişî ser o endamê Komîteya Îdarekare ya Merkezî ya PAKî Hanîfî Tûranî qiseykerdişêk kerd. Dima ra sînevîzyono ke 38 deqîqe bi û behsê cuyayîş û tekoşînê Mela Mistefa Barzanîyê nêmerdeyî kerdêne ame nîşandayene.

Sînevîzyonî ra dima mabênêk ame dayene.

Beşa diyîne ya yadkerdişî de, ewilî Cigêrayox Kerem Serhedî, pey ra zî nuştox, Cigêrayox Seîd Verojî derheqê cuyayîş û têkoşînê Mela Mistefa Barzanîyê nêmerdeyî de qalî kerd. Seydayê Mele Îmadî û Şêx Mîzbehê Silîvî zî seba Mela Mistefa Barzanîyê nêmerdeyî de şîîr wendin.

Beşa hîrêyîne ya yadkerdişî de mêmamê kombîyayîşî derheqê Mela Mistefa Barzanîyê nêmerdeyî de hîs û fikrê xo îfade kerdî.