Merkezê Xeberan - Çîn welato ke tewr zêde qurbanê vîrusî tede estê yo. Çîn de 3 hezar û 199 kesî merdî. La nika Çînî ra xeberê weşî yenê. Roja yewşemeyî 20 kesî pê vîrusî kewtî. 16ê ci teberê Çînî ra yê.

Îran

Goreyê hûmaranê fermîyan 113 kesê bînî Îran de merdî. Bi no qayde hûmara qurbananê vîrusî bîy 724. Îran de 13 hezar û 938 kesî zî pê vîrusî kewtî. Beni ke bîlançoya Îranî do biba giranêr. Çimeyê muxalîfî yê Îranî vanê ke 4 hezar û 500 kesî vîrusî ra merdî.

Îtalya

Rêxistina Weşîye ya Dinya (WHO) aşkere kerd ke merkezo newe yê vîrusî Ewropa yo. Îtalya de şanê yewşemeyî goreyê eşkerayîya fermîye 368 kesî mabênê 24 saetan de merdî. Bi no qayde hûmara qurbanan Îtalya de bîy 1809. Welat de 25 hezar kesî zî nêweşê Korona yê.

Îspanya

Îspanya de heta nika 208 kesî vîrusî ra merdî. Mabênê 24 saetanê peyênan de 2 hezar kesê bînî pê vîrusî kewtî ke bi nê hawayî hûmara nêweşanê Koronabîye 8 hezar kesî. Hukmatê Îspanya rewşa lezabeze îlan kerde, welat binê karantîna de yo.

Fransa

Fransa de 120 kesî Korona ra merdî û 5 hezar û 400 kesî nêweşê Korona yê. Fransa de kafe, restaurantî, dibistanî, marketî pêro girewte yê.  Yeno vatene ke senaryoyê bitehlûkeyî yê ke pêşkêlê hukmatê Fransa ameyî kerdene bîyî semed ke tebdîrê lezabezî bêrê girewtene. Goreyê rojnameyê Le Monde epîdemolojîstan rewşa tewr xirabêre hesab kerde. Pisporan rewşe ercnaye û hîşyarî daye ke eke hukmat tebdîranê radîkalan nêgêro hûmara qurbanan do biresa 500 hezar kesî.

Eke tebdîrî nêrê girewtene beno ke bi mîlyonan kesî bimirê