Cuya dengbêj Seyîdxanê Boyaxcîyî sey belgefîlma zaf dengbêjanê Kurdan a. Seyîdxanê Boyaxcîyî cuya xo de zaf zehmetî anto û nika keyeyê xo de, mîyanê nîvînan de yo û felc bîyo. Boyaxcî dengbêjîye ra hes keno û vano, dengbêjî eşq o.

Dengbêjêko vengweş û bi vatişê şarî “Xalê Seyîdxanê Boyaxcî”  qijtîya xo ra nata Amed de dengbêjîye keno. La Seyîdxanê Boyaxcî (Seydo Şîmşek) nika keyeyê xo de mîyanê nîvînan de yo û felc bîyo. Seyîdxanê Boyaxcî Keyeyê Dengbêjan de sey bilbilê Amedî amêne naskerdene.

Seyîdxanê Boyaxcî serra 1933î de Dewa Erxenî Lexerî de ameyo dinya. Boyaxcî 2 serrîya xo de dadîya xo û 4 serrîya xo babîyê xo vindî keno. Datê Boyaxcîyî ey keno wey û qijtîya xo de şîwanetî keno. Boyaxcî 15 serrîya xo de yeno Dîyarbekir û qezaya Sûrî de karê boyaxkerdişê solan keno. Boyaxcî 25 serrî nê karî keno. Demêk Beledîyeya Dîyarbekirî de sey karkerê pakîye xebitîyeno û masaîyê xo ra dima zî Berê Koyî de hewna karê boyaxî keno.

 Nika keye de yo û felç bîyo

Her çiqas zî Seyîdxanê Boyaxcî xebitîyêne zî her şewe şîyêne dîwanê dengbêjan û uca de dengbêjî kerdêne. Boyaxcî keyeyê Dengbêjan o ke mîyanê Sûrî de ca gêno de hema her roj deyrî vatêne.  Seyîdxanê Boyaxcî dima ra nêweş kest û xeylê nêweşxaneyan de derman geyra la nêeşka dermanêk bivîno. Nika keyeyê xo de mîyanê nîvînan de yo û felç bîyo.

Boyaxcî behsê ciwantîya xo û vîr û vînayîşê xo wina keno “Mi gelêk wext awa sûsê rot. Min bi serran pişta xo de selike hemalî kerd. Ez sey emele zaf xebitîyaya û mi karê pakîye kerd. La mi Diyarbekir rê zaf hes kerd. Mi pere qezenc kerd û ez zewicîyaya. Zewacî ra dima 7 qijê mi nêweşî ver merdî. Têdima 7 domanê mi merdî.”