Jenosîdê Helebçeyî her çar perçeyanê Kurdistanî de ewro zî bi hewayeko cîya-cîya dewam keno.

Seke yeno zayayene ney ra 36 serrî ver, roja 16ê adara 1988î de, bajarê Başurê Kurdistanî Helebçe hetê rejîmê Seddam Husênî ra bi bombayanê kîmyewîyan ame bombardumankerdene û 5000 kesî ra zaf kurdî ameyî qetilkerdene û bi hezaran kesî zî birîndar bîy. Zafanê nê qurbanîyan doman, cinî û pîr bîy.

Bêguman, Helebçe de tena 5 000 hezar merdimî namey qetilkerdiş la hetêkî ra wijdanê merdimîye zî ame qetilkerdiş. Ney ra Jenosîdê Helebçeyî sucêkê merdimayî yo.

Helbete Jenosîdê Helepçeyî tena wehşet û pîsîya Seddam Husênê faşîst û dîktatorî nêbî la eslê xo de semedê heme însanetî zî şerm û lekeko pîl bi.

Gama ke Helebçe de no jenosîd ame kerdene, çi heyf ke seraser heme dinyaya îslame, dewletê herême û heme dinyaya erebî, Yewîya Sowyetan, Japonya, Çîn, dewletê Ewropa û Dewletê Yewbîyayeyî yê Amerîka (DYA) zî bêveng mendî û çimê xo no qirkerdiş û jenosîdî rê girotî. Dinya verbê Jenosîdê Helepçeyî kor, kerr û lal mendibî.

Jenosîdê Helepçeyî ser ra 36 serrî vîyertî la şarê Kurdîstanî ewro hîna zî rastê neheqî û tecawuzî, zulm û zordarî, qetlîam û qirkerdişî, wêrankerdiş û qirkerdişan yeno.

Semedo ke miletê kurdî û cîya-cîya grûbanê etnikîyan ra şarê Kurdistanî nêreso heqanê xo yê neteweyî û demokratîkan û yew ca de zî statuko sîyasî qezenc nêkero Tirkîya, Îran, Iraq û Sûrîya proplemanê mîyanê xo danê kîşte û verba (duştê) miletê kurdî heme plan, hêriş û stratejîyanê xo yê muşterek û zafhetinan tetbîq kenî.

Dewletanê pîlan yê dinya senî ke çimê xo Jenosîdê Helebçeyî rê girotîbî, ewro zî çimanê xo hêriş, îşxale, qetlîam û plananê nê her çar dewletanê îşxalker û kolonîyalîstan rê genê. Ewro reyna zî wijdanê merdimîye erdê Kurdistanî ser o her ca de yeno qetilkerdiş.

Labelê, ma zî birîna xo ya xorine hê bi destê xo hîna kenî gonên û xidare, amayoxê xo bi destê xo kenî tarî û xirab. Reyna ma her çar perçeyanê Kurdistanî de zî bêtifaqîya xo ya neteweyî de israr kenî û hişmendîya neteweyî aver nêbenî û bi destê xo rayîrê azadî û xoserîye kenî zor û derg.

Labelê, torê na rewşa xirabe û nê çîyanê nêgatîfan zî dewaya azadî û xelasîya neteweyî ya Kurdîstanî  dewam kena. Senî ke vizêr Jenosîdê Helebçeyî û Enfalî nêeşkey verê têkoşînê şarê ma bigerî, ewro zî tu kes û tu hêriş, qetlîam û wêrankerdişê dewletanê îşxalker û kolonyalîstan nêeşkenê (bese nêkenê) vernîya dewaya welatêko xoser, miletêko azad û cimatêko demokratîkî bigêrê.

Ma do na birîna xo ya tarîxî, a ke eslê xo de zeîfîya hişmendîya milî û bêîttîfaqîya milî ra yena, bi xurtkerdişê hişmendîya neteweyî û yewîya neteweyî, bi siyasetêko xoser û bi şexsîyet bipêşî. Miletê kurdî miletêko qedîm û tarîxî yo, çi rey vera îşxalkeran û kolonyalîstan sareyê xo nêtewênayo, xoverdayîş û serewedartişo ke heta ewro hemberê îşxalkerî û kolonyalîzm dewam kerdo semedê xoserîye û azadîye bîyo kulturê cuyayîşê miletê Kurdî û semedî mucadeleyî ma zî bîyo yew mîraso tarîxî.

Wa dişmenê miletê kurdî baş bizanê ke ma nê rayîrê xo yê meşrûyî ra esla peyser anêgeyrenî û qet şik tede çino ke ma do na dewaya xo ya tarîxî û bi heq de serkewî.

Ma veng danî Miletanê Yewbîyayeyîyan (MY) ke Jenosîdê Helebçeyî resmen qebul bikerî!

Ma serrgêra Jenosîdê Helebçeyî ya 36ine de heme kerdox û hetkaranê nê jenosîdî şermezar û lanet kenî!

Ma şehîdanê Jenosîdê Helepçeyî û heme şehîdanê Kurdîstanî reyna zî bi hurmet yad kenî!

16.03.2024

Buroya Çapemenî ya Partîya Welatparêzanê Kurdistanî (PWK)