Biryar hat dayîn ku Fermandarê Hêzên Şingalê Qasim Şeşo were desteserkirin.

Qasim Şeşo bi “heqaretkirina li Pêxemberê Îslamê” tê tohmetbarkirin.

Biryara desteserkirina wî îro ji aliyê Dadgeha Lêkolînan a Nînowayê ve hat dayîn.

Dadwer Yasîn Mihemed Fethî biryara desteserkirina Qasim Şeşo îmze kir.

Dadgehê xwestiye ku Şeşo li gorî xala 195an a Yasaya Cezayan a Îraqê were darizandin.

Di biryarê de navê Qasim Şeşo nehatiye gotin lê hatiye gotin ku ew sala 1953yan li Şingalê ji dayîk bûye.

“Piştgirên DAIŞê sûdê jê werdigirin”

Fermandarê Hêzên Êzidxanê Heyder Şeşoyê ku heman demê biraziyê Qasim Şeşo ye, ji Rûdawê re got ku gotinên apê wî hatine berovajîkirin û li pey çû:

“Ew mesele gelekî hatiye mezinkirin, mebesta wan têkelkirina mijarê ye çimkî piştgirên DAIŞê sûdê jê werdigirin.

“Dê helwesteke me jî hebe”

Eger ev miamele berdewam bike dê helwesteke me jî hebe çimkî ewên ku îro li dijî me derdikevin rojekê li beramberî wan hemû destdirêjî û binpêkirinên li hemberî miletê me neaxivîn.”