Ferît Şenyaşaro ke 11 rojî yo seba edaletî çalakîya roniştişî keno vat: ''Dîmenê nêweşxaneyî destê serdozgerî de yê. Wa dozger wezîfeyê xo bîyaro ca, ma zî do çalakîya xo biqedînê. Ma do waştişê edaletî ra fek vera nêdê.''

Emîne Şenyaşara ke qezaya Pirsûsî ya Riha de hemserê ci Haci Esvet Şenyaşar û 2 lajê ci Adil û Celal Şenyaşar hetê merdimanê AKPyî Îbrahîm Halîl Yildizî ra ameyî qetilkerdene, lajê xo Ferît Şenyaşarî reyde verê Edlîyeyê Riha de 11 rojî yo çalakîya edaletî kena.

Ferît Şenşarî ard ziwan ke ê têkoşînê edalet û heqî kenê û vat: ''Eke waştişê edaletî sûc o ez û dadîya xo ma tim nê sûcî bikerê. Dîmenê nêweşxaneyî destê serdozgerî de yê. Wa dozger wezîfeyê xo bîyaro ca, sûcdaran tepişno ma zî do çalakîya xo biqedînê. Ma do waştişê edaletî ra fek vera nêdê.''