Grûbê çekdarê ke dest ronayê bajarê Kurdan Efrîn ser, hetêk Kurdan remnenê û keyeyanê înan ra fidye wazenê, hetêk ra dest ronenê mal û milkê înan ser û hetêk ra Kurdan bi îşkence qetl kenê. 

Na hewe Kurdo ke dewa Behdîna ra 9 menge verê cû amebi remnayîş bi îşkence ame kiştiş. 

Teşkîlatê Heqanê Merdiman derheqê hedîse de beyanatêk da û va: Grûbêka çekdare 9 aşmî verê cû dewa Behdîna ra welatîyo Kurd Beyrem Sîno remnabi.  Ameyo zanayîş ke Beyrem Sîno hetanî nika hepisxaneyê înan de mendo û vizêr bi îşkence ameyo qetlkerdiş. 

Gorê melumatê Teşkîlatê Heqanê Merdiman, Beyrem Sîno ewilî hetê grûba Ehfad El Resûlî ra ameyo remnayîş û dima ra hetê na grûbe ra teslîmê grûba Muhtesim Billahî bîyo û bi deste na grûbe bi îşkence ameyo kiştiş.