Roşnvîrê Kurdan Celadet Elî Bedirxan 71 serrî verî cû wefat kerd. Celadet Elî Bedirxan serrgêra mergê xo de hetê Platformê Ziwanê Kurdkî ra ame yadkerdiş.

Ziwannas û roşnvîrê Kurdan Celadet Elî Bedirxan 71 serrî verî cû mîyanê ma ra bar kerd. Celadet Elî Bedirxan serrgêra mergê xo de hetê Platformê Ziwanê Kurdkî ra bi malûmatêk ame yadkerdiş.

Malûmatê nuştekî yê PZKyî yê “PZK Mîr Celadet Bedirxanî bi rêzdarî yad keno’yî wina yo:

“15ê Temûze 1951î de Mîr Celadet Bedirxanî mîyanê ma ra bar kerd. A roje estareyêkî keyeyê Bedirxanîyan visîyabi û wefat kerdibi. Na roja sîyaye de ezmanê Kurdistanî xemgîn bibi. Hewran hêsirî kerdêne war û sewtê zerencan birîyabi…

“Na roja tarîye de Kurdî Mîr Celadet Bedirxanî bi rêzdarî yad kenê. Weş yeno zanayîş ke Mîr Celadet Bedirxanî mîyanê şertanê zehmetan de Kurdan ra xatir waştibi. Ey xebatê derg û dilayî kerdibî û kedêka bêemsale dabî. Sey roşvîranê Kurdanê bînan bi kederêk mîyanê Kurdan ra bar kerdibi. Pêro Kurdî kedere Mîr Celadetî pare kenê. Vayê xemgînîye seranserê Kurdistanî ra gêra û hîsê welatperwerîye zerra Kurdan de zergûn bi…”

“Celadet Elî Bedirxanî vervateyê kovara Hawarî de vatibi, ‘Hawar vengê zanayîşî yo. Zanayîş xo naskerdiş o. Xonaskerdiş ma rê raya xelas û weşîye akeno. Kesê ke xo bişinasnê, eşkenê xo bide şinasnayîş. Hawarê ma do verê her çîyî estbîyayîşê ziwanê ma bido şinasnayîş. Ziwan şertê verînî yê estbîyayîşî yo. Ma pêro pîya wayîrê Hawarî bivejîyê û ey pîl bikerê’.”

“Heya, Platformê Ziwanê Kurdkî do rayîrê xebatanê Mîr Celadet Bedirxan û hemarayanê ci ra şêro û bi sebir û hişmendîye xebatanê xo biramno. Karê ziwanî karêko pêroyî yo û bê xebata sîyasî qet nêbeno. Coka mas ey PZKyî vanê; Welatperwerîye bê ziwanê Kurdkî nêbena. Sîyasetê Kurdan bê zieanê Kurdkî nêbeno. Nasnemeyê Kurdan bê ziwanê Kurdkî nêbeno. Xoverdayîşê heqanê Kurdan bê ziwanê Kurdkî nêbeno. Kurdbîyayîş bê ziwanê Kurdkî nêbeno. Ziwanê Kurdkî do mîyanê heteketanê Kurdan bibo rengê pêro Kurdan. Çimkî ziwanê Kurdkî raşta zî estbîyayîşê ma yo. Estbîyayîşê neteweyê ma yo.”

“Bi nê hîsîyatan ma roja barkerdişê Mîr Celadet Bedirxanî yad kenê. Ma şarê Kurdî rê serweşîye wazenê û ma reyna vanê; seba ziwanê Kurdkî xebatî do tim dewam bikerê!”