Merkezê Xeberan - Elewîyan îfade kerd ke ê wazenê naye ra pey zî her menga Xizirî de Duzgun Baba de cemê xo bikerê û bawerîya xo bimojnê domanan, ciwanan.

Qezaya Qisleyî ya Dêrsimî de Jîyargeyê Duzgun Babayî de serra 1970î ra pey reya verêne cemê Xizirî ame girêdayene.
Merkezê Dêrsimî ra, qezayanê  Dêrsimî û dewanê Qisleyî ra zaf kesî tewrê cemî bîyî. Cem bi gulbangê Zeynel Batarî yê Ocaxê Celal Abbasî û tavisnayîşê çilayan dest pêkerd. Pîr Zeynel Batarî, Ocaxê Kureyşanî ra Mehmet Alî Akbayir, Selvî Açikgoz û Ocaxê Mansur Babayî ra Îmam Bakî Aydin erkanê cemî da destpêkerdene. Cem de lawikî ameyî vatene, semahî ameyî kerdene. Xoşebera erkanê cemî ra dima gulbangî ameyî wendene û loqmeyê qavutî û nîyazî ameyî vilakerdene.

Polîsan Qilse de  bi wesayîtanê zirxinan verê şarî girewt û  destûr nêda ke girse şoro cem. Xîret û îtîrazê îdareyê cemxaneyî û hemwelatîyan ra dima polîsî nêeşkîyayî verê hemwelatîyan bigêrê. Hemwelatîyan û temsîlkaranê dezgehan PÎRHA reyde qisey kerd û da zanayene ke 50 serran ra dima Duzgun Baba de cem yeno kerdene û ê wazenê ke her menga Xizirî de Duzgun Baba de cemê xo bikerê. Elewîyan ard ziwan ke ê wazenê bi nê hawayî bawerîya xo bimojnê û bimusnê ciwanan û domanan û seba naye xîret bikerê.