Polîsên Stenbolê roja yekşemê 21ê Cotmehê, di saet:09.30an de, Cengîz Güngörê nûnerê PAKê yê Stenbolê, ji mala wî wergirtin û birin li Emnîyetê îfadeya wî sitendin.

Di peyama ku ji aliyê Buroya Çapemenî û Ragihandinê ya PAKê ve hatî şandin de di derbarê Güngörî de wisa hat gotin:

"Cengîz Güngör piştî ku îfadeya xwe da serbest hate berdan.

Li Emnîyeta Stenbolê bi îdîaya ku Cengîz Güngör ‘’li ser sosyal medyayê propagandaya rêxistina terorê kirîye û pesnê wê daye’’ îfadeya wî hate sitendin.

Ew çalakîyên ku weke sebebê ‘’propagandaya rêxistina terorê’’ hatine destnîşan kirin jî ev in:

*Li Amedê , di sala 2015an de meşa jinan ya ku PAK jî beşdar bûye.

*Civîn û resepsîyona ku bi minasebeta yekemîn salvegera PAKê ya ku li Amedê hatibû li dar xistin.

*Civîn û çalakîya ji bo bi bîr anîna jenosîda Enfalê.

Nûnerê partîya ma yê Stenbolê Cengiz Güngör, ev îdîayên hatine kirin gişt red kir û got ‘’Ev tiştên ku hûn behs dikin gişt jî çalakî û civînên PAKê yên yasayî û meşrû ne.Tu eleqeya wê bi terorê û bi rêxistineke din ve tuneye. PAKê bi dehan caran li gorî bîr û bawerî û bernameya xwe çalakî ûxebatên bi vî rengî kirine’’.

Cengiz Güngör hate berdan , lê di rojên pêş de wê dîyar bibe ka dê dozger di derheqê wî de dozê veke yan na.

Belê, ne cara yekem e ku PAK tûşî êrîşên bi rengî dibe. Berîya vê jî, Serokê Giştî yê partîya me û gelek rêvebir û endamên me jî tûşî lêpirsînan bibûn, di derheqê wan de doz hatibûn vekirin; hinek hevalên me jî ceza xwaribûn.

Dewleta Tirkîyeyê, bi taybetî berê xwe daye wan partî û kesayetîyên ku xebata legal dimeşînin û li dijî şer û tûnd û tûjîyê derdikevin: dewleta Tirkîyeyê dixwaze rê li ber xebatên wan yên sîyasî û yên fikrî bigire. Ev jî gelekî balkêş e.

Em van êrîşên li ser azadîya ramanî û azadîya xebata rêxistinî şermezar dikin."

21.10.2018

Buroya Çapemenî û Ragehandinê ya PAKê