Merkezê Xeberan- Bajarê  Bakurê Kurdistanî Çewlîg de Merkezê Perwerdeyî yê Şarî ke girêdayîyê Wezaretîya Perwerdeyî yo de seba musayîşê lehçeya Kurdkî Zazakî kurs yeno akerdiş.

Gorê beyanatê keyepelê Merkezê Perwerdeyî yê Şarî, kesê ke wazenê beşdarê kursan bibê eşkenê keyepelê (http://bingolhem.gov.tr/) se ra formê muracatî dekerê.

Akademîsyen Murat Varol o ke Unîversîteya Çewlîgî de kar keno, derheqê abîyayîşê kursî de, hesabê xo yê medyaya sosyale ser ra beyanat da û şarê Çewlîgî ra waşt wa beşdarê kursî bibê û ziwanê xo bimusê.

Verê cû zî kitabê musayîşê Zazakî yê sinifa 5-8  hetê akademîsyenanê Unîversîteya Çewlîgî û mamosteyanê Unîversîte ra amebi hadrekerdiş û kitab hetê Wezaretîya Perwerdeyî ya Tirkiya ra amebi qebûlkerdiş.

La o kitab gorê alfabeya Kurdî ney gorê alfabeya Tirkî amebi hadrekerdiş.

Vajîyeno ke, eke no perwerdeyo ke yeno dayîş de zî alfabeya Kurdkî ney, alfebeya Tirkî bêra şuxulnayîş, no kurs do feyde ney zirar bido lehçeya Kurdkî Zazakî û tu feydeyê xo nêbo.