Merkezê Xeberan - Çarçewa ''Rayraşîyayîşê Demokrasîyî'' yê HDPyî de ke seba ewro ameyêne plankerdene, Colemêrg de eşkerayîya çapemenîye û zîyaretê esnafan hetê polîsan ra ameyî astengkerdene. Polîsan vizêr dormeyê bînaya HDPyî ya Colemêrgî û şaristanî girewtbi.

Seba astengîye qerarê walîtîye sey bahane ame mojnayene. Hemserekê HDPyî Mîthat Sancar, Hemserekê KCDyî Berdan Ozturk, Hemsereka DBPyî Salîha Aydenîz, Hemvervatoxê HDKyî Sedat Şenoglu, Hemsereka SYKPyî Canan Yuce, Hetkarê Hemserekanê ESPyî Beycan Taşkiran, endamê Meclîsê Rayberdişî yê HDPyî, wekîlî, endamê HDPyî serê sibayî verê bînaya partîye de kom bîyî.

Destpêkerdişê rayraşîyayîşî ra verî serê sibayî pêro şaristan hetê polîsan ra gêrîya binê ablûqa. îmê taybetî û sekbanî zî verê dezgehanê dewlete de ameyî cakerdene. Çar hetanê şaristanî de wesayîtê zirxînî û polîsî estê.

Rayraşîyayîşê Demokrasîyî yê HDPyî Îstanbul de zî dîya destpêkerdene. Polîsan Îstanbul de rayraşîyayîş asteng kerd. 6 kesî ameyî destbendkerdene.