Dadgeha Bilind Federal a Iraqê biryarên Encûmena Wezîrên Iraqê ya şandina 1.3 trîlyon dînar bo Herêma Kurdistanê nedestûrî da zanîn.

Dadgeha Bilind a Federal a Iraqê îro Çarşemê 25ê Çileya 2023an li ser giliya parlamenterê serbixwe û endamê Komîteya Darayî ya Parlamentoya Iraqê Mistefa Senad û Parêzgarê Wasitê Mihemed Meyahî ya derbarê şandina mûçeyên karmendên Herêma Kurdistanê civiya.

Li gorî biryara Dadgeha Bilind a Federal a Iraqê, 6 biryarên Encûmena Wezîran a Iraqê ya şandina pereyan ji bo Herêma Kurdistanê “nedestûrî” ne.

Dadgeha Bilind a Federal a Iraqê, piştî çend caran paşxistin, îro metna biryara xwe eşkere kir.

Li gorî Dadgeha Bilind a Federalî, biryarên Encûmena Wezîrên Iraqê berovajî yasaya bûdceya sala 2021 û yasaya rêveberiya darayî ya sala 2019ê bûn ku şandina pereyan ji bo Herêma Kurdistanê pêwîstî bi paqijkirina darayî ya girêdayî dahatên neftê û neneftê Herêma Kurdistanê heye. Encûmena Wezîran nabe biryarekê bide ku giraniya wê ya aborî li ser xezîneya dewletê be berovajî yasaya budce û yasaya rêveberiya darayî.

Dadgehê 6 biryarên Encumena Wezîran bi “nedestûrî” ragihand, 5 ji wan li ser şandina 200 milyar dînar bo Herêma Kurdistanê ango trîlyonek dînar û yek jî şandina 3 milyar dînar bo qerebûkirina welatiyên ku ji ber lehiyê zirar dîtine.

Li gorî biryara Dadgeha Bilind a Federal a Iraqê; şeş biryarên ku wek nedestûrî hatine ragihandin ev in: Biryara jimare 194 ya 15ê Hezîrana 2021ê, biryara hejmara 26ê ya 6ê Tîrmeha 2021ê, biryara hejmara 257ê ya 3ê Tebaxa 2021ê, biryara jimare 335 a sala 2021an ku di 22ê Îlona 2021an derketiye, biryara hejmar 401 2ê Cotmeha 2021an û biryara 8 a 11ê Çileya 2022an.

Ev biryar ji aliyê her 9 endamên Dadgeha Bilind a Iraqê ve hatiye îmzekirin.

Rûdaw