Merkezê Xeberan- Danîmarka de 9 partîyanê sîyasîyanê ke parlemento de yenê temsîlkerdene, seba qedînayîşê îşxalkarîya Tirkîya ya Rojavayê Kurdistanî parlamentoyî ra waşt ke qerar bigîro.

Parlamenteranê 9 partîyanê sîyasîyan ê Danîmarka  vizêr vernîyazêko hempar pêşkêşê parlamentoyî kerd û seba şermezarkerdişê îşxalkarîya Tirkîya waşt ke parlamento qerar bigêro.

Temsîlkaranê partîyanê sîyasîyan waşt ke parlamento Tirkîya ra biwazo ke îşxalkarîya xo vindarne, leşkeranê xo tepîya biance û  waşt ke rotişê çekan ê seba Tirkîya bêro qedexekerdene. Parlamenteran hukmatî ra waşt ke Yewîya Ewropa verba îşxalkarîya Tirkî hînî zêdêr bi hewayêkê çalakîyî tê bigêre û NATO û platformanê mîyanneteweyî de Tirkîya rê tedaye bike.  Reyna parlamentoyî ra ameye waştene ke Parlamento qerar bigêro ke Rojawanî rê hetkarîya merdimîye biko.

Wayîrê Vernîyazî:  Partîya Sosyal Demokrate S) ra Anetta Lind,  Partîya Çepe (K) ra Michael Aastrup Jensen, Partîya Şarî ya Danîmarka (DF) ra Soren Espersen,  Çepa Radîkale (RV) ra Martin Lindegaard, Partîya Şarî ya Sosyalîste (SF) Karsten Honge, Lîsteya Yewîye(EL) ra Eva Flyvholm,  Partîya Mûxafazakare (KF) ra Naser Khader, Alternatîfe (ALT) ra Rasmus Nordqvist û Îttifaqo Lîberal (LA) ra Henrik Dahl.