DEDEFî beyan kerd ke, rolê îqtîdarî şewatan de esto û veng da ke wa şewatan rê mudaxale bêro kerdiş.

Heyetê Pawitişê Munzurî yê Federasyonê Komeleyanê Dêrsimî (DEDEF)  derheqê şewatê Dêrsimî yo ke bi rojano dewam keno de Kadikoyê Îstanbulî de eşkerayî da.

Eşkerayî semedê kesan û heme ganîyan ê ke şewat de merdî bi rêzgirewtişî dest pêkerd. Eşkerayî hetê  Serekê Komeleya Dêrsimijan ê Kocaelî Ruhî Çelîkî ra amey wendiş.

Beyanat de îzah bi ke, xeylê cayanê welatî de şewatî dewam kenê û wîna wajîya: ''Xoza bi rijyayîşî rî bi rî ya. Des hezaran kesî cayê xo ra koç kerd, 9 hemwelatîyan zî cuya xo vînî kerd. Pê destê qeyûman THK ameyo bêtesîrkerdene û îdarekarê dewlete paştî nêdanê îdareyanê herêmîyan. Rîyê nînan ra zî şewatî rê kêm ya zî erey mudaxale yeno kerdiş. Reyna tay cayan de şar wazeno şewatî hewna bikero la hêzê dewlete destûrê înan nêdanê. Çîyo winayên nêno qebulkerdene. 

Heto bîn ra zî bi bahaneyê şewatan hêrişê nîjadperestî zêdîyenê. Ma nê hêrişanê nîjadperestî red kenê. Ganî derheqê şewatan de koordînasyon bêro amadekerdene û semedê vindarnayîşê xebata cidî bêra kerdene. Reyna badê şewatan zî taxrîbatan tesbît bikero. Îqtîdar genî kêmîyan bivîno û vernîya şewatanê neweyan bigîro. Aladagan ra  heta Munzurî, Koyê Cûdîyî ra heta Kaçkarlarî xozaya ma semedê rantî  çîn kenê. Her cayê welatî de hemwelatîyî vera ney vejîyenê.  No welat bêwayîr nêyo.''